પહાડો પરની હિમવર્ષાના કારણે સમગ્ર ઉત્તર ભારત ઠંડીમાં ઠૂંઠવાયું: વાવાઝોડું ‘ફેંગલ’ વિનાશક બનશે

હવામાન વિભાગે ખાનાખરાબીનું એલર્ટ જારી કર્યું: લોકોને સતર્ક રહેવા માટે અપીલ કરવામાં આવી

દેશના વાતાવરણમાં સતત ફેરફાર થઈ રહ્યા છે. ઉત્તર ભારતમાં પહાડ પર હિમવર્ષાના કારણે દિલ્હી, હરિયાણા અને યુપીનાં ઘણાં શહેરમાં તાપમાન સતત ગગડી રહ્યું છે. લોકો ઠંડીમાં ઠૂંઠવાઇ રહ્યા છે, બીજી તરફ બંગાળની ખાડીમાં ફેંગલ ચક્રવાત આગામી એક-બે દિવસમાં વધુ વિનાશક થવાની સંભાવના વધી રહી છે. ચક્રવાતી તોફાન ફેંગલને લઈ હવામાન વિભાગે ચેતવણી બહાર પાડી છે. લોકોને સતર્ક રહેવા માટે અપીલ કરવામાં આવી છે, કારણ કે આ વાવાઝોડું ભારે પવન સાથે અનેક વિસ્તારમાં તબાહી મચાવી શકે છે. તામિલનાડુના અનેક વિસ્તારમાં વરસાદ ચાલુ છે. આજે પણ ફેંગલના કારણે અનેક રાજ્યમાં મુશળધાર વરસાદનું એલર્ટ છે. ટ્રેન અને ફ્લાઈટને લઈ પણ એલર્ટ જારી કરાયું છે.