ફેંગલ વાવાઝોડાની અસર રાજ્યમાં પણ જોવા મળી: દક્ષિણ ગુજરાતમાં માવઠાની આગાહી

કચ્છનું નલિયા ૧૨ ડિગ્રી સાથે રાજ્યનું સૌથી ઠંડું શહેરઃ રાજકોટમાં ૧૩.૪ ડિગ્રી ઠંડી

ફેંગલ વાવાઝોડાએ દક્ષિણનાં રાજ્યો તામિલનાડુ અને પુડુચેરીમાં ભારે વિનાશ વેર્યો છે. દક્ષિણ ભારતનાં આ રાજ્યોના દરિયાકાંઠે આવેલા અનેક જિલ્લાઓમાં ભારેથી અતિ ભારે વરસાદ ખાબકતાં જનજીવન અસ્તવ્યસ્ત બન્યું છે અને ઠેર ઠેર જળબંબાકારનાં દૃશ્યો જોવા મળી રહ્યાં છે. સ્થાનિક હવામાન વિભાગ અને ટોચના હવામાન નિષ્ણાતોએ તેમની આગાહીમાં જણાવ્યું છે કે ફેંગલ વાવાઝોડાની અસરના કારણે ગુજરાતનું વાતાવરણ પણ પલટાયું છે. ખાસ કરીને આજે સવારે રાજ્યનાં મોટા ભાગનાં શહેરોનું લઘુતમ તાપમાન ઘણું નીચું નોંધાયું હતું. આગામી દિવસોમાં અમદાવાદ સહિત રાજ્યભરના લોકોએ કાતિલ ઠંડીના રાઉન્ડ માટે તૈયાર રહેવું પડશે તેવું પણ હવામાન નિષ્ણાતો જણાવી રહ્યા છે.