‘ક્રાઈમ કંટ્રોલ’તા પોલીસના દાવા વચ્ચે રૂપિયાની લેતીદેતીમાં બુટલેગર્સનો સરદારનગરમાં આતંક

કેટરિંગના રૂપિયા લેવા જતા યુવકે રાજુ ગેંડીતા પુત્ર પર હુમલો કર્યો: વળતા જવાબમાં રાજુ ગેંડીએ પુત્રો સાથે મળીને યુવક અને તેના ભાઈને માર માર્યો

શહેરમાં પોલીસે કિલ્લેબંધી કરી દીધી હોવા છતાંય ગુનેગારો બેફામ થઇ ગયા હોય તેવું લાગી રહ્યું છે. પોલીસ કમિશનર જી.એસ.મલિક ગુનાખોરીનો ગ્રાફ ઘટ્યો હોવાનો દાવો કરી રહ્યા છે ત્યારે બુટલેગર્સ દ્વારા હુમલાની ઘટનાઓ એક પછી એક સામે આવી રહી છે. શહેરના ઓઢવ વિસ્તારમાં બુટલેગર્સે કરેલા પથ્થરમારાની ઘટના હજુ શાંત નથી પડી ત્યારે સરદારનગરમાં કુખ્યાત બુટલેગર રાજુ ગેંડી અને તેના પુત્રોએ કેટરિંગના રૂપિયા આપવા મામલે હુમલો કર્યો છે, તો બીજી તરફ રાજુ ગેંડીના પુત્ર ઉપર પણ છરી વડે હુમલો થયો છે. સરદારનગરમાં સામસામે હુમલો થતાં પોલીસ ટેન્શનમાં આવી ગઇ છે અને આવનારા દિવસોમાં ફરીથી હિંસક હુમલા થાય તેવી શક્યતાઓ દેખાઇ રહી છે.

સરદારનગર વિસ્તારમાં આવેલા રમેશ દત્ત કોલોનીમાં રહેતા નરેશ ઉર્ફે અંધેરુ ટેકવાણીએ સરદારનગર પોલીસ સ્ટેશનમાં કુખ્યાત બુટલેગર રાજુ ઉર્ફે ગેંડી ક્રિષ્ણાની, તેના પુત્ર રવિ અને વિકી વિરુદ્ધ હુમલાની ફરિયાદ કરી છે. નરેશ સંયુક્ત પરિવારમાં રહે છે અને કિરાણાની દુકાન ધરાવીને ધંધો કરે છે. નરેશનો ભાઇ કિશોર સરદારનગર ખાતે આવેલા હરિહર ફ્લેટમાં રહે છે. બે દિવસ પહેલાં નરેશ તેના મિત્ર વિજય સાથે સરદારનગર સર્કલ ખાતે નાસ્તો કરવા માટે ગયો હતો. રાતે પોણા એક વાગ્યાની આસપાસ બંને નાસ્તો કરીને પરત આવી રહ્યા હતા ત્યારે સરદારનગર કોહિનૂર કોલ્ડ ડ્રિંક્સ નામની દુકાનની પાસે લોકો ટોળું વળીને ઊભા હતા.