மறைந்த தந்தையின் கனவை நனவாக்கும் பயணத்தில் மகள்

கப்பல் கேப்டனாக வேண்டும் என்ற மறைந்த தன் தந்தையின் சிறுவயதுக் கனவையும், தன் சொந்த விருப்பத்தையும் நிறைவேற்றும் பயணத்தை மேற்கொண்டுள்ளார் 16 வயது அர்ச்சனா சந்திரசேகரன்.

- யோகிதா அன்புச்செழியன்‌

சிங்கப்பூர்ப் பலதுறைத் தொழிற்கல்லூரியின் சிங்கப்பூர் கடல்துறைப் பயிற்சிக் கழகத்தின் முதல் ஆண்டு மாணவரான அர்ச்சனா, கப்பல்துறை சார்ந்த பட்டயப் படிப்பு பயின்று வருகிறார்.

உபகாரச் சம்பளம் பற்றி...

'பிஏசிசி ஷிப் மேனஜர்ஸ்' (PACC Ship Managers) நிறுவனத்தின் ஆதரவில் வழங்கப்படும் முத்தரப்புக் கடல்துறைசார் உபகாரச் சம்பள விருதை (Tripartite Maritime Scholarship) அண்மையில் பெற்ற அர்ச்சனா, எதிர்காலத்தில் பெண் மாலுமிகள் பலருக்கு வழிகாட்டியாக இருக்க வேண்டும் என்பதில் உறுதியாக உள்ளார்.

கடந்த செப்டம்பர் 6ஆம் தேதி நடைபெற்ற உபகாரச் சம்பள விருதளிப்பு நிகழ்ச்சியில் இந்த உபகாரச் சம்பள விருதைப் பெற்ற 10 பேரில் இவரும் ஒருவர்.

2002ஆம் ஆண்டு அறிமுகப்படுத்தப்பட்ட முத்தரப்புக் கடல்துறைசார் உபகாரச் சம்பள விருது, சிங்கப்பூர் கடல்துறைப் பயிற்சிக் கழகத்தில் கடல்சார் பொறியியல் பட்டயப் படிப்பு (Diploma in Marine Engineering) அல்லது கப்பல்துறை சார்ந்த பொறியியல் பட்டயப் படிப்பில் பயிலும் மாணவர்களுக்கு வழங்கப்படுகிறது.