பிறப்பால் சீனர்கள், உணர்வால் தமிழர்கள்

சொந்த மண்ணிலிருந்து வேரோடு அகற்றி வேறு மண்ணில் நடப்பட்ட இளஞ்செடிகள் அக்கறையுடன் பராமரிக்கப்படும்போது குறையின்றி வளர்வதுண்டு. அவை நீண்ட நெடு மரங்களாக ஓங்கி, பிறருக்கு நிழல் தரும் வன்மையைப் பெறுவதுமுண்டு.

சிங்கப்பூரில் அந்தக் காலத்தில் சொந்தக் குடும்பத்தினரால் கைவிடப்பட்ட பெண் பிள்ளைகள், தத்துக் குடும்பங்களால் அரவணைக்கப்பட்டதைக் காட்டும் சில கதைகள், ‘சிறு துளிகள்: கடந்தகால சிங்கப்பூரின் செல்லப் பிள்ளைகள்’ (Little Drops: Cherished Children Of Singapore’s Past) என்ற நூலில் இடம்பெற்றுள்ளன.

இத்தகைய பெண்கள் 14 பேரின் உருக்கமான கதைகள் வரலாற்று அடிப்படையில் தொகுக்கப்பட்டுள்ளன. இவை பிரிவின் வலியையும் பரிவின் வலிமையையும் எடுத்துக்கூறுகின்றன.

முற்காலச் சமூகத்தில் வாழ்ந்த, நட்பு, சமூக உறவுகள், சிங்கப்பூர்க் குடியேறிகளின் மரபு எனப் பல்வேறு அம்சங்களை அறிய, ஆராய, முனைவர் தெரேசா தேவசகாயம் திரட்டியுள்ள இந்தத் தகவல் பெட்டகம் உதவலாம்.

இவர் சிங்கப்பூர் சமூக அறிவியல் பல்கலைக்கழகத்தைச் சேர்ந்த குடும்ப, பாலின மானுடவியலாளர் (family and gender anthropologist) ஆவார்.

பூசலுக்கிடையே பூத்த புன்னகை மலர்

திருமதி ஜேன் தேவசகாயம், 86, நான்கு வயதுச் சிறுமியாக இருந்தபோது சிங்கப்பூரிலும் அன்றைய மலாயாவிலும் ஜப்பானியப் படையெடுப்பு நிலவியது. மனைவியை இழந்த சீன விவசாயி ஒருவரிடமிருந்து தமிழ்க் குடும்பம் ஒன்று அவரைத் தத்தெடுத்துக்கொண்டது.

1947ல் வளர்ப்புத் தாயார் கிரேஸ் ஜோசஃப்புடன் ஒன்பது வயது ஜேன் வில்சன் தேவசகாயம். சிறு வயதில் ஜேன், பிறரால் ‘பாக்கியம்’ எனச் செல்லமாக அழைக்கப்பட்டார். படம்: Little Drops: Cherished Children Of Singapore’s Past

ஜேன் பிறந்தபோதே அவரது தாயாரின் உயிர் பிரிந்ததால் குழந்தை ஜேன் ராசியற்றவராகக் கருதப்பட்டார்.

சீனப் பஞ்சாங்கத்தின்படி புலி ஆண்டில் பிறந்தார் அவர். புலி ஆண்டில் பிறக்கும் பெண் குழந்தைகள், கோபம் மிக்கவர்களாக வளர்வர் என்றும் குடும்பத்திற்கு துரதிர்ஷ்டம் சேர்ப்பவர்கள் என்றும் சிலர் நம்புகின்றனர்.

ஆனால் தத்தெடுக்கப்பட்ட குடும்பத்தில் இவரது செல்லப் பெயர் ‘பாக்கியம்’.

தனது தோலின் நிறம் குறித்துத் தாயாரிடம் கேட்டபோதெல்லாம், “நீ சிறு குழந்தையாக இருந்தபோது பால் குடம் ஒன்றுக்குள் விழுந்துவிட்டாய்,” என விளையாட்டாகச் சொல்வாராம் அந்தத் தாயார்.

பிரசவத் தாதியாக வேலை பார்த்த அந்தத் தாயார், பிறகு ஜேனிடம் அவர் தத்தெடுக்கப்பட்ட உண்மையைக் கூறினார்.