தஞ்சை, திருவாரூர் மாவட்டங்களில் பல்வேறு பகுதிகளில் நெற்பயிற்கள் மழைநீரில் மூழ்கின நெருங்கும் ‘ஃபெங்கல்’ புயல்; முடங்கிய டெல்டா மாவட்டங்கள்

வங்கக்கடலில் உருவான காற்றழுத்தத் தாழ்வு மண்டலம், 'ஃபெங்கல்' புயலாக வலுப்பெறும் என இந்திய வானிலை மையம் அறிவித்த நிலையில், சென்னையிலும் டெல்டா மாவட்டங்களிலும் மக்களின் இயல்பு வாழ்க்கை பாதிக்கப்பட்டுள்ளது.

இலங்கைக் கடற்பகுதி வழியாக தமிழக கடற்கரை நோக்கி இந்தப் புயல் நகரும் என வானிலை ஆய்வாளர்கள் கணிப்பு வெளியிட்டுள்ளனர்.

சென்னை உள்ளிட்ட கடலோர மாவட்டங்களில் நவம்பர் 28 முதல் டிசம்பர் 1ஆம் தேதி வரை, நான்கு நாள்களுக்கு மிக கனமழைப் பெய்யக்கூடும் என வானிலை ஆய்வு மையம் முன்னறிவித்திருந்தது.

சென்னை, திருவள்ளூர், காஞ்சிபுரம், செங்கல்பட்டு, விழுப்புரம் மாவட்டங்களில் மிக கனமழைக்கான ‘ஆரஞ்ச் அலெர்ட்’ அறிவிக்கப்பட்டுள்ளது.

வீடுகளுக்குள் முடங்கிய பொதுமக்கள்: இந்நிலையில் நாகை, மயிலாடுதுறை, திருவாரூர், காரைக்கால் உள்ளிட்ட பல மாவட்டங்களில் கடந்த இரு நாள்களாகத் தொடர்ந்து மழை பெய்வதால் பொதுமக்களின் இயல்பு வாழ்க்கை பெரும் பாதிப்புக்குள்ளானது.

பொதுமக்கள் வீடுகளுக்குள் முடங்கிக்கிடக்க நேரிட்டது.

நாகப்பட்டினம் மாவட்டத்தில் குடியிருப்புப் பகுதிகளை மழைநீர் சூழ்ந்ததால், மக்கள் அவதிக்கு ஆளாகினர்.

திருவாரூர் மாவட்டத்தின் பல்வேறு பகுதிகளில் நெற்பயிற்கள் மழைநீரில் மூழ்கின.

நாகை, வேளாங்கண்ணி, வேதாரண்யம், தரங்கம்பாடி, பூம்புகார் உள்ளிட்ட பகுதிகளில் கடல் சீற்றத்துடன் காணப்படுகிறது.