சமூக ஊடகங்களை அவ்வப்போது தவிர்ப்பதால் ஏற்படும் நன்மைகள்

இரண்டே இரண்டு வாரங்கள் போதும். சமூக ஊடகங்களை இந்த இரு வாரங்களுக்குத் தவிர்த்தாலே உடல்நலம், மனநலம், பிறருடன் பழகும் ஆற்றல் ஆகியவை மேம்பட்டுவிடும்.

- நந்தினி சுவாமிநாத ராஜா

திறன்பேசிகளின் மீதும் சமூக ஊடகங்களின் மீதும் உள்ள மோகம் இதனால் குறையும் என்று ‘பிஹேவியரல் சயின்சஸ்’ (Behavioural Sciences) அறிவியல் சஞ்சிகையில் ஆக அண்மையில் வெளியிடப்பட்ட ஆய்வு குறிப்பிடுகிறது.

மின்வெளியில் தொடர்புகளை அதிவேகத்தில் உண்டாக்கும் சமூக ஊடகங்கள், பலரது அன்றாட வாழ்க்கையில் அங்கமாகிவிட்டன. உலகநடப்புகள் முதல் நண்பர்களும் குடும்பத்தினரும் சாப்பிடும் உணவு உள்ளிட்ட உடனடித் தகவல் உள்ளங்கையில் அடக்கம்.

இருப்பினும் வரம்பின்றிச் சமூகத்தளங்களைப் பயன்படுத்துவதால் ஏற்படும் எதிர்மறை விளைவுகளும் ஏராளம். தூக்கம் கெடுதல், கவலை, நேரத்தை விரயமாக்குதல் போன்ற பிரச்சினைகளும் ஏற்படக்கூடும்.