உள்ளூர் ஊழியர் நிகர வருமானம் 3.4% அதிகரிப்பு

சிங்கப்பூரில் இவ்வாண்டு நடுத்தர மற்றும் குறைந்த வருமானப் பிரிவில் உள்ளோரின் நிகர வருமானம் உயர்ந்துள்ளது.

பணவீக்க அடிப்படையிலான மதிப்பீட்டுக்குப் பிறகு அந்த விவரம் தெரிய வந்தது.

கடந்த ஆண்டு காணப்பட்ட எதிர்மறைப் போக்கிலிருந்து வருமான நிலவரம் மீண்டுள்ளதை மனிதவள அமைச்சு வியாழக்கிழமை (நவம்பர் 28) வெளியிட்ட அறிக்கை குறிப்பிட்டது.

சிங்கப்பூரர்கள் மற்றும் நிரந்தரவாசிகளை உள்ளடக்கிய சிங்கப்பூர்வாசிகளின் ஊழியரணி நிலவரம் தொடர்பான அமைச்சின் வருடாந்திர அறிக்கை அது.

நடுத்தர, குறைந்த வருமானப் பிரிவினருக்கு இடையிலான வருமான இடைவெளி குறைந்திருப்பதையும் அந்த அறிக்கை சுட்டியது.

நடுத்தர வருமானப் பிரிவினரின் நிகர வருமானம் இவ்வாண்டு 3.4 விழுக்காடும் குறைந்த வருமானப் பிரிவினரின் நிகர வருமானம் 4.6 விழுக்காடும் உயர்ந்துள்ளன.