அபுதாபியில் குடும்ப விவகார அலுவலகத்தை அமைக்கும் சிங்கப்பூர் செல்வந்தர்

சிங்கப்பூரின் பெரும் சொத்து ரிமையாளர்களான தந்தை, மகனான திரு ராஜ் குமார், திரு கிஷின் ஆர்.கே. இருவரும் அபுதாபியில் குடும்ப விவகார நிர்வாக அலுவலகத்தை அமைக்கவுள்ளனர்.

'ஆர்பி' குடும்ப விவகார நிர்வாக அலுவலகம் என்ற அந்த நிறுவனம் ஐக்கிய அரபு சிற்றரசுக்களின் தலைநகர் அபுதாபியில் உள்ள அல் மரியா தீவில் அமையும் என்று புளூம்பர்க் செய்திக்கு அளித்த நேர்காணலில் திரு கிஷின் கூறினார்.

அபுதாபி கேந்திர முக்கியத்துவம் வாய்ந்த இடத்தில் அமைந்துள்ளது. உலகளவில் அங்கீகரிக்கப்பட்ட சட்ட கட்டமைப்பைக் கொண்டுள்ளது என்பதால் அங்கு அலுவலகத்தை அமைப்பதாக திரு கிஷின் கூறினார்.

ஏறக்குறைய 3.15 பில்லியன் அமெரிக்க டாலர் (4.22 பி. சிங்கப்பூர் வெள்ளி) நிகர மதிப்புக்கொண்ட அக்குடும்பத்தின் சொத்தை நிர்வகிக்கும் முதல் அலுவலகம் அது. எனினும் அது எவ்வளவு பணத்தை நிர்வகிக்கும் என்று திரு கிஷின் கூற மறுத்துவிட்டார்.