దుర్గే.. దేవీ నమోస్తుతే

దసరా అనగానే ముందు గుర్తొచ్చేది పెద్ద పండుగ అని, అమ్మవారి పూజలు. ఇంకా బొమ్మల కొలు , దాండియా ఆటలు.. ఓహ్! ఒకటేమిటి..అనేకం.

- పి.యస్.యమ్. లక్ష్మి

దసరా అనగానే ముందు గుర్తొచ్చేది పెద్ద పండుగ అని, అమ్మవారి పూజలు. ఇంకా బొమ్మల కొలు , దాండియా ఆటలు.. ఓహ్! ఒకటేమిటి..అనేకం. మరి పండుగ వస్తోంది కదా. ఇల్లు శుభ్రం చేసుకుని అమ్మవారి పూజలకు అన్నీ సిద్ధం చేసుకున్నట్లు, అసలు మన చుట్టుపక్కల ఎవరేం చేస్తున్నారో..పండుగ ఎలా చేసుకుంటు న్నారో.. ఓ కన్నేయొద్దూ!? పక్కిం టావిడ పట్టుచీర కన్నా మన కాటన్ చీర డిజైనూ, రంగూ డాబుగా వుందని అందరూ మెచ్చుకోవద్దూ! మరి పదండి. ముందు మన చుట్టూ అంతా ఏం చేస్తున్నారో ఓసారి చూసి తర్వాత మనమేం చెయ్యాలో మనకెటు తెలుసుగా.

ఈ కాలం పిల్లలు మన పండగలు, ఆచారాల గురించి పట్టించుకోవటం లేదని పెద్దలు వాపోతున్నారు. అందుకే ముందుగా ఈనాటి యువత కోసం పండగ ఎప్పుడు జరుపుకుంటారో, ఎందుకు జరుపుకుంటారో చెప్తాను.ఇది ఆశ్వీయుజ మాసంలో శుద్ధ పాడ్యమి నుంచి శుద్ధ నవమి వరకు అంటే తొమ్మిది రోజులు జరుపుకునే పండుగ ఇది. అందుకే కొందరు దీనిని పెద్ద పండుగ అంటారు. కానీ తెలుగువారు పెద్ద పండుగ అంటే సంక్రాంతి అంటారు. భిన్న ప్రాంతాలు, భిన్న అభిప్రాయాలు. ఇన్ని రోజులు ఏం చేస్తారు అంటారా? దీనికంటే ముందు ఈ పండగ ఎందుకు చేస్తారో తెలుసుకుందాం.