సాహితీశరథి దాశరథి

సాహిత్యం

- బి. నాగలక్ష్మి

సాహిత్యం

తెలంగాణ ముద్దుబిడ్డ, పీడిత ప్రజల గొంతుక, నిజాంకు సూటిగా తన ధిక్కార స్వరాన్ని వినిపించి నిజాం నవాబు గుండెల్లో సింహస్వప్నమై నిలిచిన ప్రళయమూర్తి మన దాశరథి. తెలంగాణ విముక్తి కోసం అలుపెరుగని పోరాటం చేసిన వారిలో ముఖ్యుడు. నిజాంను ఎదిరించటానికి ఒక్కరు కాదు..సమాజమంతా శక్తిగా మారాలని తలచి, తన అక్షరాలను ఆయుధంగా మలచి ప్రజల్లో చైతన్యం తెచ్చి అందరినీ ఒక్క తాటిపై నడిపిన మహానాయకుడు దాశరథి.

ఇప్పుడు తెలంగాణ ఆడపడచు సంతోషంగా, బతుకమ్మ పండుగ జరుపుకుంటోందంటే నిజాం పైశాచిక పాలన నుండి విముక్తి చెందటమే అని చెప్పుకోవచ్చు. తెలంగాణ విముక్తి కోసం పోరాడి అమరులైన వారందరికీ స్త్రీ లోకం తరపున ఇదే మా పుష్పాంజలి. తెలంగాణ పోరాటం చేసి, సాధించి, ఆ ఫలాలను స్వీకరించి ప్రజల నూతన జీవితానికి మంచి మార్గం వేసిన దాశరథిని గుర్తు చేసుకుందాం.

దాశరథి కృష్ణమాచార్య జులై 7, 1925లో మహబూబాబాద్ జిల్లా, చిన్న గూడూరు గ్రామంలో వేంకటమ్మ, వేంకటాచార్య దంపతులకు జన్మించాడు. నవంబరు 5, 1987 సంవత్సరంలో స్వర్గస్తుడయ్యాడు. ఇతని బాల్య విద్య ఖమ్మం, మధిరలో, ఇంటర్మీడియట్ మధ్యప్రదేశ్లోని భోపాల్లో, డిగ్రీ ఇంగ్లీషు సాహిత్యంతో ఉస్మానియా విశ్వవిద్యాలయంలో పూర్తి గావించాడు.