ஈரோடு இடைத்தேர்தல் வெற்றி என்பது 'திராவிட மாடல்' அரசுக்குக் கிடைக்கும் வெற்றி! தேர்தல் ஆணையம் என்பது சுதந்திரமாக செயல்படவில்லை!

தமிழ்நாட்டில் சட்டம் - ஒழுங்கு சரியில்லை என்று சொல்ல அண்ணாமலைகளுக்குத் தகுதி உண்டா?

சேலத்தில் செய்தியாளர்களிடையே தமிழர் தலைவர்

சேலம், பிப்.21

ஈரோடு இடைத்தேர்தல் வெற்றி என்பது 'திராவிட மாடல்' அரசுக்குக் கிடைக்கும் வெற்றி! தேர்தல் ஆணையம் என்பது சுதந்திரமாக செயல்படவில்லை! தமிழ்நாட்டில் சட்டம் - ஒழுங்கு சரியில்லை என்று சொல்ல அண்ணாமலைகளுக்குத் தகுதி உண்டா? என்றார்  திராவிடர் கழகத் தலைவர் தமிழர் தலைவர் ஆசிரியர் கி.வீரமணி.

நேற்று (20.2.2023) சமூகநீதி பாதுகாப்பு, திராவிட மாடல் ஆட்சியின் சாதனை விளக்கப் பரப்புரைக் கூட்டத்தின் இரண்டாம் கட்டம் முடிந்து, சேலத்தில் திராவிடர் கழகத் தலைவர் தமிழர் தலைவர் ஆசிரியர் கி.வீரமணி அவர்கள் செய்தியாளர்களுக்குப் பேட்டியளித்தார். அவரது பேட்டி வருமாறு:

சேலம் சுயமரியாதை சங்கக் கட்டடம்

சேலத்தில் 1938 ஆம் ஆண்டு முதற்கொண்டு, தந்தை பெரியார் அவர்களாலும், அன்றைய சுயமரியாதை இயக்கத்தவர்களாலும் சேலம் சுயமரியாதை சங்கக் கட்டடங்களையெல்லாம் அமைத்து, வாசகசாலை போன்றவை அமைந்து பிரச்சாரப்பணிகள் நடந்துகொண்டு வந்தன.

கலைஞரைப் போன்றவர்கள், எங்களைப் போன்ற வர்கள் எல்லாம் மாணவப் பருவத்திலேயே சுற்றுப் பயணம் செய்த காலத்தில், சேலம் சுயமரியாதை சங்கக் கட்டடத்தில்தான் நாங்கள் தங்குவது வழக்கம்.

இரண்டு சங்கங்களுடைய 

நோக்கமும் ஒன்றல்ல!

அதை சில நண்பர்கள், பெரியார் அவர்கள் மறைந்த உடனே தங்களுடைய ஆக்கிரமிப்பில், பெரும்பாலோர் மனுகுல  தேவாங்கர் சங்கத்தைச் சார்ந்தவர்களாக இருந்த காரணத்தினால், யாருக்கும் தெரியாமல் அவர்கள் தங்களுடைய சங்கத்தோடு, சேலம் சுயமரியாதை சங்கத்தை இணைக்கிறோம் என்று சொல்லி, அவர்கள் இணைத்துக் கொண்டார்கள். அப்படி இணைத்து, அந்தக் கடட்டங்களையெல்லாம் இடித்துவிட்டார்கள்.