தொழிலாளர்களின் குரலுக்கு முன்னுரிமை கொடுக்க வேண்டும்

காங்கிரஸ் தலைவர் மல்லிகார்ஜுன கார்கே மே நாள் அறிக்கை

புதுடில்லி, மே 2- இன்றைய உலகைக் கட்டியெழுப்புவதில் தொழிலாளர்களின் பங்களிப்பு மற்றும் தியாகத்தை பன்னாட்டு தொழிலாளர் தினம் குறிக்கிறது. நியாயமான மற்றும் சமமான ஊதியம், பாதுகாப்பான பணிச்சூழல், பணியிடம், நீதிமன்றங்கள் மற்றும் அரசாங்கத்தில் அவர்களுக்கு குரல் கொடுக்கும் உரிமை ஆகியவற்றுக்காக தொழிலாளர்கள் நடத்திய நீண்ட போராட்டத்தை இன்று (1.5.2023) நாம் நினைவில் கொள்கிறோம்.

சுதந்திரத்துக்குப் பிறகு தொழிலாளர்களை பாதுகாத்து அரசாங்கங்கள் அதிகாரம் அளித்துள்ளன. ஆனால், கெட்ட வாய்ப்பாக  தொழிலாளர்களின் உரிமையை மோடி அரசாங்கம் பின்னோக்கி தள்ளியுள்ளது.

3 விவசாய சட்டங்களைப் போல் 4 தொழிலாளர் சட்டத் திருத்தங்களும் நாடாளுமன்றத்தில் அவசர அவசரமாக கொண்டு வரப்பட்டு பின்னர் திரும்பப் பெறப்பட்டன. தொழிலாளர் சட்ட திருத்தங்களில் அபாயகரமான குறைபாடுகள் உள்ளன. இவை தொழிலாளர்களுக்கு எதிரானவை.

முதலாவதாக, பெரும்பாலான தொழிலாளர்கள் அல்லது நிறுவனங்களுக்கு சட்ட திருத்த விதிமுறை பொருந்தாது. உதாரணமாக, 300 பேருக்கும் குறைவானோர் வேலை செய்யும் நிறுவனங்கள் அனுமதியின்றி தொழிலாளர்களை பணிநீக்கம் செய்யலாம்.

அல்லது ஆலைகளை மூடலாம். 50-க்கும் குறைவான தொழிலாளர்களை பணியமர்த்தும் ஒப்பந்ததாரர்களுக்கு பணியிட பாதுகாப்புச் சட்டங்களில் இருந்து விதிவிலக்கு அளிக்கப்பட்டுள்ளது. வருங்கால வைப்பு நிதி, பணிக்கொடை, காப்பீடு மற்றும் மகப்பேறு பலன்கள் போன்ற சலுகைகள் சிறு நிறுவனங்களுக்கு கிடைக்காது.