மணிப்பூர் கலவரத்தை கண்டித்து காங்கிரஸ் கட்சியினர் ஆர்ப்பாட்டம்

மணிப்பூர் கலவரத்தைக் கண்டித்து தமிழ்நாடு முழுவதும் காங்கிரஸ் கட்சியினர் நேற்று (26.7.2023)   ஆர்ப்பாட்டத்தில் ஈடுபட்டனர்.

பந்தலூர் மணிப்பூரில் நடந்து வரும் கலவரத்தை கண்டித்தும், அங்கு அமைதியை நிலை நாட்டவும் வலியுறுத்தி நெல்லியாளம் நகர காங்கிரஸ் கமிட்டி சார்பில் பந்தலூர் அருகே தேவாலாவில் ஆர்ப்பாட்டம் நடைபெற்றது. ஆர்ப்பாட்டத்திற்கு நெல்லி யாளம் நகர தலைவர் ஷாஜி தலைமை தாங்கினார். ஆர்ப்பாட்டத்தில் மணிப்பூரில் கலவரத்தை கண்டித்து முழக்கம் எழுப்பப்பட்டது. இதில் தமிழ்நாடு காங்கிரஸ் பொதுக்குழு உறுப்பினர் கோபிநாத், நிர்வாகிகள் அனீஷ், பிரபு, ஜோனி, வின்சன்ட், சவுக்கத், சந்திரன், ஹரீஷ் குமார் உள்பட பலர் கலந்து கொண்டனர்.

திருநெல்வேலி

மணிப்பூர் மாநிலத்தில் நடைபெற்ற சம்பவத்தை கண்டித்தும், அங்குள்ள முதலமைச்சர்மீது நடவடிக்கை எடுக்க வேண்டும் என்பன உள்ளிட்ட கோரிக்கைகளை வலியுறுத்தியும் காங்கிரஸ் கட்சியின் சார்பில் நேற்று  (26.7.2023) நெல்லை மாவட்டத்தில் பல்வேறு இடங்களில் மெழுகுவத்தி ஏந்தி ஆர்ப்பாட்டத்தில் ஈடுபட்டனர்.

பாளையங்கோட்டை தொகுதி சார்பில் பாளையங்கோட்டை கோட்டூர் சாலையில் உள்ள காந்தி சிலை முன்பு காங்கிரசார் மெழுகுவத்தி ஏந்தி ஆர்ப்பாட்டத்தில் ஈடுபட்டனர். மாவட்ட துணைத் தலைவர் மாரியப்பன் தலைமை தாங்கினார். மாவட்ட தலைவர் சங்கரபாண்டியன், மாநில வழக்குரைஞர்  அணி இணைத் தலைவர் மகேந்திரன் ஆகியோர் ஆர்ப்பாட்டத்தை தொடங்கி வைத்து பேசினார்கள். இதில் கலந்து கொண்ட வர்கள் கோரிக்கையை வலியுறுத்தி முழக்கம் எழுப்பினர்.

இதேபோல் நெல்லை சட்டமன்ற தொகுதி சார்பில் நெல்லை டவுன் காந்தி சிலை முன்பு ஆர்ப்பாட்டம் நடந்தது.