കോലിക്ക് കാലിടറുമ്പോൾ

ടീം എന്ന നിലയിൽ മുന്നേറുമ്പോഴും കോലിയുടെ ഫോം ഇന്ത്യയെ അലട്ടുന്നുണ്ട്. ഒട്ടേറെ യുവതാരങ്ങൾ അവസരം കാത്തിരിക്കുമ്പോൾ ലോകകപ്പ് ടീമിൽ കോലിക്ക് അവസരം നൽകണോ എന്ന ചോദ്യം ബാക്കിനിൽക്കുന്നു

- കെ. സുരേഷ്

ബ്രണ്ടൻ മക്കെല്ലം പരിശീലകനും ബെൻ സ്റ്റോക്സ് ക്യാപ്റ്റനുമായ ഇംഗ്ലണ്ട് ടെസ്റ്റ് ടീം ഏകദിനത്തെക്കാൾ ആക്രമണാത്മകമായി ടെസ്റ്റിൽ കളിക്കാമെന്ന് കാണിച്ചുതന്നു. അതിൽ വിജയിക്കുകയും ചെയ്തു. ഏകദിനത്തിൽ ഇംഗ്ലണ്ട് ജോസ് ബട്ലർ എന്ന ക്യാപ്റ്റനെ അവതരിപ്പിച്ചു. ടെസ്റ്റിൽ ജസ്പ്രീത് ബുംറ ഇന്ത്യയെ നയിക്കുമെന്ന് ആരും പ്രതീക്ഷ കാണുന്നില്ല. അത് സംഭവിച്ചു. ഇംഗ്ലണ്ടിനെതിരേ അവരുടെ മണ്ണിൽ ഏകദിന ട്വന്റി 20 പരമ്പരകൾ ജയിക്കുമെന്നത് അത്ര എളുപ്പമായിരുന്നില്ല. അതും സംഭവിച്ചു.

പക്ഷേ, ജയപരാജയങ്ങളെക്കാൾ, ഈ പരമ്പരയെ ചരിത്രം ഓർക്കുക വിരാട് കോലിയുടെ പേരിലായിരിക്കും. സമ്പന്നമായ ഒരു ക്രിക്കറ്റ് കരിയറിൽ സംഭവിക്കുന്ന പ്രതിസന്ധി ഏതറ്റംവരെയാകാമെന്ന്  ഉദാഹരിക്കാൻ ഭാവിയിൽ ഈ പരമ്പരയെക്കുറിച്ച് പറയാനിടയുണ്ട്.

കോലിയുടെ ക്രിക്കറ്റ് കരിയർ ശരിക്കും ഒരു പാഠപുസ്തകമാണ്. ഏറെ വെല്ലുവിളികളും സമ്മർദങ്ങളും നിറഞ്ഞ ക്രിക്കറ്റ് എന്ന ഗെയിമിൽ എത്രത്തോളം പൂർണതയോടെ കളിക്കാനാകും എന്നതിന് ആധുനിക കാലത്ത് കോലിയോളം പറ്റിയ മാതൃകയില്ല. ഒരു പ്രൊഫഷണൽ ക്രിക്കറ്റ് കരിയറിൽ കൈവരിക്കാവുന്ന ഉയരത്തിന്റെ ഉദാത്ത മാതൃകയാണ് ആദ്യപകുതിയങ്കിൽ അതിന്റെ താഴ്ച എത്രത്തോളമാകാമെന്നതാണ് രണ്ടാംപകുതി കാണിക്കുന്നത്.

അന്താരാഷ്ട്ര ക്രിക്കറ്റിൽ കോലി സെഞ്ചുറി നേടിയിട്ട് മൂന്നുവർഷത്തോളമായി. 2019-ൽ ബംഗ്ലാദേശിനെതിരേ കൊൽക്കത്തയിലെ ഈഡൻ ഗാർഡൻസിൽ നടന്ന പിങ്ക് ബോൾ ടെസ്റ്റിലാണ് അവസാന സെഞ്ചുറി പിറന്നത്. ഏകദിനത്തിലും ടെസ്റ്റിലുമായി പത്തുവർഷത്തിനിടെ 70 സെഞ്ചുറി നേടിയ കളിക്കാരനാണ് പിന്നീട് മൂന്നുവർഷത്തോളമായി നൂറ് റൺസ് കടക്കാത്തത് എന്നോർക്കണം.

മൂന്നുവർഷത്തോളമായി കോലി പടവുകൾ തിരിച്ചിറങ്ങുകയായിരുന്നു; കളിക്കാരൻ എന്ന നിലയിലും ക്യാപ്റ്റൻ എന്ന നിലയിലും. ടെസ്റ്റ് ചാമ്പ്യൻഷിപ്പ് ഫൈനലിൽ ന്യൂസീ ലൻഡിനോട് തോൽവി. ട്വന്റി 20 ലോകകപ്പിൽ പ്രാഥമിക റൗണ്ടിൽ തന്നെ പുറത്ത്. തുടർന്ന് ട്വന്റി 20 ക്യാപ്റ്റൻ പദവി കോലി സ്വയം ഉപേക്ഷിക്കുന്നു. പിന്നീട് ഏകദിന, ടെസ്റ്റ് ക്യാപ്റ്റൻസികൾ ഇന്ത്യൻ ക്രിക്കറ്റ്  കൺട്രോൾ ബോർഡ് (ബി.സി.സി.ഐ.കോലിയിൽ നിന്ന് എടുത്തുമാറ്റുന്നു.