അറേബ്യാൻ കാർണിവൽ

നിലയ്ക്കാത്ത ആനന്ദത്തിന്റെയും നുരഞ്ഞുപൊന്തുന്ന ആവേശത്തിന്റെയും വിരുന്നാകും ഖത്തറിലെത്തുന്നവരെ കാത്തിരിക്കുന്നത്. 'മാതൃഭൂമിക്കുവേണ്ടി ലോകകപ്പ് റിപ്പോർട്ട് ചെയ്യുന്ന സിറാജ് കാസിം ആ അദ്ഭുതലോകത്തിലേക്ക് ഫുട്ബോൾ ആരാധകരെ ക്ഷണിക്കുന്നു

- സിറാജ് കാസിം

“പറക്കും തളികയിൽ
പാതിരാത്തളികയിൽ
പണ്ടൊരു രാജകുമാരൻ
അറബിക്കഥയിലെ
ആകാശക്കോട്ടയിലെ
അദ്ഭുതവിളക്കിന് പോയി...

വയലാർ എഴുതി ദേവരാജൻ ഈണമിട്ട ഈ സിനിമാപ്പാട്ട് ഖത്തറിലെ ഫുട്ബോൾ ലോകകപ്പിനെത്തുന്ന ഒരു താരം പോലും കേട്ടിട്ടുണ്ടാകണമെന്നില്ല. അവരാരും ഈ മലയാള സിനിമാപ്പാട്ട് ജീവിതത്തിൽ ഇനിയൊരിക്കലും കേൾക്കാനും സാധ്യതയില്ല. എന്നാൽ പാട്ടിൽ പറയുന്ന അദ്ഭുതവിളക്കുപോലെ ഒരു സ്വപ്നം ഖത്തറിലെ മണ്ണിൽ കാത്തിരിക്കുന്നുണ്ട്. ഫുട്ബോളിലെ ഒന്നല്ല, ഒരുപാട് രാജകുമാരൻമാരാണ് അറബിക്കഥയിലെ  അദ്ഭുതവിളക്ക് പോലെയുള്ള ആ കിരീടം തേടി ഖത്തറിലേക്ക് പറക്കുന്നത്.

കാലിലും ഖൽബിലും ഒരുപോലെ പറ്റിപ്പിടിച്ച് ഉരുളുന്ന ഒരു പന്തിന് പിന്നാലെ ലോകം മുഴുവൻ സഞ്ചരിക്കുന്ന രാപകലുകളിൽ ആ രാജകുമാരൻമാർക്ക് വേണ്ടിയാകും ഭൂമി പോലും സ്പന്ദിക്കുന്നത്. ഭൂമിയിലെ കായികപോരാട്ടങ്ങളിൽ ഏറ്റവും ആവേശകരമായ വിരുന്നായ ലോകകപ്പ് ഫുട്ബോളിന്റെ ഖത്തർ പതിപ്പ് കൈയെത്തും ദൂരത്തെത്തുമ്പോൾ ലോകം മുഴുവൻ അതിൽ ത്രസിക്കുന്നുണ്ട്.

അഞ്ചുവട്ടം ചാമ്പ്യൻമാരായ ബ്രസീൽ മുതൽ ആദ്യമായി ലോകകപ്പ് കളിക്കുന്ന ഖത്തർ വരെ ആ രോമാഞ്ചത്തിൽ ഒരുപോലെ അണിചേരുന്നു. ഒരിക്കൽപ്പോലും ലോകകപ്പ് കളിക്കാത്ത നമ്മൾ ഇന്ത്യക്കാരും ബ്രസീലിനെക്കാളും ഖത്തറിനെക്കാളും ആവേശത്തിൽ കാൽപ്പന്തുകളിയുടെ രാജകീയ വേദിയിൽ പന്തുരുളുന്നത് കനവു കണ്ടിരിക്കുന്നുണ്ടെങ്കിൽ അതിന് പിന്നിൽ ഒരേയൊരു വികാരമേയുള്ളൂ, ഫുട്ബോൾ

രാജകുമാരൻമാർ വരട്ടെ