മെസ്സി, എംബാപ്പെ: സ്വപ്നാടകരുടെ യാത്രകൾ

ലയണൽ മെസ്സിയുടെ പട്ടാഭിഷേകത്തോടെ ഫുട്ബോൾ ലോകകപ്പിന് തിരശ്ശീല വീണിരിക്കുന്നു. അവിസ്മരണീയ മൂഹൂർത്തങ്ങൾ സമ്മാനിച്ചാണ് ഖത്തർ ആരാധകരെ യാത്രയാക്കുന്നത്

- എം.പി. സുരേന്ദ്രൻ

ഉദ്ഘാടനദിനത്തിൽ അൽഖോറിലെ മൈതാനത്ത് മോർഗൻ ഫ്രീമാൻ എന്ന വിഖ്യാത നടനും ഭിന്നശേഷിക്കാരനായ അൽ മുഫ്തയും പറഞ്ഞത് മണലാരണ്യത്തിലേക്ക് ഒട്ടകങ്ങളുമായി വിണ്ടുകീറിയ പാദങ്ങളോടെ, വറ്റിവരണ്ട തൊണ്ടകളോടെ കടന്നുവന്ന ജനപദങ്ങളുടെ തീർഥയാത്രയെക്കുറിച്ചായിരുന്നു. റൊസാരിയോയിൽ നിന്നുവന്ന ആ അർജന്റീനക്കാരനും ഇതൊരു സ്വപ്നയാത്രയായിരുന്നു. പന്തിന്റെ ഏറ്റവും മികച്ച സ്വപ്നാടകനുള്ള പുരസ്കാരം ഏറ്റുവാങ്ങിയശേഷം ആ സ്വർണകപ്പിൽ നനഞ്ഞ കണ്ണുകളോടെ ചുംബിച്ച നിമിഷത്തിൽ ലോകത്തിന്റെ ഹൃദയം ഒരു നിമിഷം ആർദ്രമായി. പിന്നെ ആരവങ്ങളിലേക്ക് കടന്നു.

ഏഴാമത്തെ കളിയിൽ ലയണൽ മെസ്സി, തന്റെ അവസാനത്തെ ലോകകപ്പ് മത്സരം കളിച്ചശേഷം ഖത്തർ അമീർ അണിയിച്ചു കൊടുത്ത അംഗവസ്ത്രം ധരിച്ച് കപ്പ് ഏറ്റുവാങ്ങിയപ്പോൾ കാലവും കാണികളും നമിച്ചു.

മുപ്പതു വയസ്സ് കഴിഞ്ഞാൽ പന്തുകളിയിൽ യൗവനമില്ല. അവർ അനിവാര്യമായ വാർധക്യത്തിലേക്ക് യാത്ര ആരംഭിക്കുന്നു. അങ്ങനെ യാത്ര തുടങ്ങിയ നെയ്മറും ക്രിസ്റ്റ്യാനോ റൊണാൾഡോയും ലൂയി സുവാരസുമെല്ലാം കണ്ണീരോടെയാണ് കളിക്കളം വിട്ടുപോയത്. ഒടുവിൽ നായകനായ ലൂക്കാ മോഡ്രിച്ചും ലോകകപ്പിന്റെ വേദിയിൽ നിന്ന് പിൻവാങ്ങി. മെസ്സി മാത്രം വിജയം എന്ന താരകമന്ത്രവുമായി അവസാനം വരെ നിന്നു. അയാൾക്ക് അർഹിച്ചതായിരുന്നു ആ കിരീടം. കിലിയൻ എന്ന കിടിലൻ എംബാപ്പെ, മൂന്ന് ഗോളുകൾ നേടി ചരിത്രത്തെ പ്രകാശമാനമാക്കിയെങ്കിലും മെസ്സിയുടെ മാന്ത്രികതയുടെ മുമ്പിൽ പരാജിതനായി.

ഫൈനൽ, ഒരു പരീക്ഷണ നാടകവേദി പോലെയായിരുന്നു കളി കരുത്തോടെയായിരുന്നു. എഴുപത്തിയെട്ടാമത്തെ മിനിറ്റു വരെ മെസ്സിയും അർജന്റീനയും ജയിച്ചുനിന്നു. ക്ലൈമാക്സിലേ ക്കുള്ള രംഗം പെട്ടെന്ന് ആന്റി ക്ലൈമാക്സിലേക്ക് നീങ്ങി. ഒരു യുഗപ്പകർപ്പുപോലെ കിടിലൻ എംബാപ്പ അവതരിച്ചു

 അതുവരെ മാരകമായ ഒരാലസ്യത്തിലായിരുന്നു ഫ്രാൻസ്. അവരുടെ മഴവിൽ ടീമിന് സമ്മർദ്ദം താങ്ങാൻ കഴിഞ്ഞില്ല. അവർ ഫുട്ബോളിലെ ആദ്യപാഠങ്ങൾ മറന്നു. അവരുടെ കാലുകളിലേക്ക് പാസ് വന്നതേയില്ല. ഇംഗ്ലണ്ടുമായുള്ള മത്സരത്തിൽ പരുങ്ങിയതിനേക്കാൾ ഗുരുതരമായിരുന്നു ഈ മാന്ദ്യം. എംബാപെയിലേക്ക് പന്ത് എത്താതിരുന്നപ്പോൾ അർജന്റീന വിജയം ഉറപ്പാക്കിയെന്നു തോന്നി. പക്ഷെ, 78-ാം മിനിറ്റിൽ, ഫ്രാൻസ് ആദ്യത്തെ സംഘടിതമായ ഒരു ശ്രമത്തോടെ മത്സരത്തിൽ തിരിച്ചെത്തി.