മണ്ണൂർനായരുടെ വംശമഹിമ

പതിനൊന്ന് ദേശങ്ങളുടെ ആധിപത്യത്തിൽ വിളങ്ങിനിന്നതാണ് മണ്ണൂർ നായർ വീട്. നൂറ്റാണ്ടുകളുടെ ചരിത്രം പറയാനുള്ള ആ വീട് ഇന്നും കാഴ്ചക്കാർക്കുമുന്നിൽ തല ഉയർത്തിനിൽക്കുന്നു

ഗൂഡല്ലൂരിലെ പന്തല്ലൂർ മലനിരകൾ തൊട്ട് പൊന്നാനി കടപ്പുറം വരെയായിരുന്നു പ്രാചീന വള്ളുവനാട് എന്നു പറയുന്നു. വെള്ളപ്പനാട്ടുകര എന്നാണ് പഴയകാല പ്രയോഗം. ഇത് സംസ്കൃതത്തിൽ വല്ലഭ ക്ഷോണി എന്ന് എ.ഡി. ഒൻപതാം നൂറ്റാണ്ടിലെ തിരുവൊറ്റിയൂർ ആധിപുരേശ്വര ക്ഷേത്ര ലിഖിതത്തിൽ രേഖപ്പെടുത്തിയിട്ടുണ്ട്. ഭരണാധികാരിയെ വെള്ളപ്പൻ എന്നും വല്ലഭരാഷ്ട്രനാഥൻ എന്നും സംബോധന ചെയ്യുന്നു. വള്ളൂക്കനാലി എന്ന് നാട്ടുവഴക്കത്തിൽ പറയുന്നു. വയസ്സു മൂത്ത സ്ത്രീക്ക് വേദപുരാട്ടി എന്നും കുളത്തൂർ തമ്പുരാട്ടി എന്നും രേഖകളിൽ കാണാം (വള്ളുവനാട് ചരിത്രം, എസ്. രാജേന്ദു).