മഞ്ഞിൽവിരിഞ്ഞ പച്ചവാലൻ തേൻകിളി

ഗ്രാമീണ സൗന്ദര്യത്തോടൊപ്പം പക്ഷിവൈവിധ്യവും ഭൂട്ടാനിലെത്തുന്ന യാത്രക്കാർക്ക് അവിസ്മരണീയമായ അനുഭവമാണ്. അവയെ കണ്ടും അറിഞ്ഞും ഭൂട്ടാനിലെ ഗ്രാമങ്ങളിലൂടെ

- TEXT & PHOTOS SETHULAL & SHYAMLAL

മഞ്ഞിൽ വിരിഞ്ഞ പ്രഭാതം. വാതിൽ തുറന്നപ്പോൾ കണ്ട കാല്പനികത തുളുമ്പുന്ന കാഴ്ച. ഒരു പച്ചവാലൻ തേൻകിളി (Green tailed sunbird) വിടർന്ന പുഷ്പത്തിൽ നിന്ന് തേൻ നുകരുന്നു. പ്രകൃതിയുടെ കണ്ണഞ്ചിപ്പിക്കുന്നവർ സൃഷ്ടിയാണ് ഈ പച്ചവാലൻ കിളി. ഭൂട്ടാനിൽ പക്ഷിനിരീക്ഷണത്തിനും ഫോട്ടോഗ്രാഫിക്കുമായി എത്തുന്നവരെ വിസ്മയിപ്പിക്കുന്ന ചെറിയ പക്ഷി. ചിറകുകളിൽ വർണങ്ങളുടെ മേളക്കൊഴുപ്പ്. പച്ചയും മഞ്ഞയും ചുവപ്പും അങ്ങിങ്ങായി നീലയും കറുപ്പും മേളിക്കുന്നു.

തേൻകിളിയുടെ കാഴ്ചയോടെ ഭൂട്ടാനിലെ പ്രഭാതം അവിസ്മരണീയമായി. ഈ ചെറിയ ഹിമാലയൻ രാഷ്ട്രത്തിൽ പ്രകൃതി അനുഗ്രഹിച്ചു നൽകിയ 670-ഓളം ഇനം പക്ഷികളുണ്ട്.  അതിൽ 60 ഇനങ്ങൾ ദേശാടനപ്പക്ഷികളാണ്. വനത്തിലെ വർണരാജികൾ എന്നാണ് ഭൂട്ടാനിലെ പക്ഷികളെ വിശേഷിപ്പിക്കേണ്ടത്. മലനിരകളിൽ മേഘങ്ങൾ ചുംബിക്കുന്ന ഹിമാലയൻ രാജ്യത്ത് പക്ഷിനിരീക്ഷണത്തിന് വേണ്ടി മാത്രമാണ് ഈ വരവ്. രാവിലെ ലോഡ്ജിന്റെ വാതിൽ തുറന്നപ്പോൾ തന്നെ ശീതക്കാറ്റ് വീശുന്ന അനുഭവം. സുഖകരമായ തണുപ്പ്. താഴ്വരകൾ, താഴ്ന്നുപറക്കുന്ന മേഘങ്ങൾ. മെല്ലെ നടന്നാൽ പക്ഷികളുടെ സംഗീതം കേൾക്കാം. നിറക്കൂട്ടുകളുമായി വൈവിധ്യമാർന്ന പക്ഷികൾ. റോഡോ ഡെൻ ഡോൺ (കാട്ടുപൂവരശ്) പൂത്തുനിൽക്കുന്ന കാഴ്ച രോമാഞ്ചമായി. മഞ്ഞിന്റെ നിരകളിൽ ചുവന്ന പുഷ്പങ്ങൾ കിരീടംപോലെയാണ്. തേൻ നുകരാനെത്തുന്ന പക്ഷികളുടെ കഴുത്തിലും മുഖത്തും വെള്ളനിറം തൂകിയതുപോലെ. പൂമ്പൊടിയുടെ സ്പർശമാണത്.