Kerala To Sikkim റ്റാഷി ദേലെ, സിക്കിം!

ഇതൊരു ലോങ്ഡ്രൈവാണ്. സമുദ്രനിരപ്പിൽനിന്ന് 10 അടി ഉയരത്തിലുള്ള തൃശ്ശൂരിൽനിന്ന് സിക്കിമിലെ 18000 അടി ഉയരത്തിൽ മഞ്ഞുമൂടിക്കിടക്കുന്ന മലമടക്കുകൾക്കിടയിലെ ഗുരുഡോങ്മാർ തടാകത്തിലേക്കുള്ള അത്യപൂർവ യാത്ര

- TEXT: BINOY MARICKAL

ഏറെ നാളായി മനസ്സിൽ കൊണ്ടു നടന്ന ആഗ്രഹമായിരുന്നു ഒരു ലോങ് ഡ്രൈവ് റോഡ് ട്രിപ്  ഒരിക്കൽ സുഹൃത്ത് സനലിനോട് സംസാരിക്കവെ സിക്കിമിലേക്ക് കാറിൽ ഡ്രൈവ് ചെയ്ത് പോയാലോ എന്ന് വെറുതേ ചോദിച്ചു. റെഡി എന്നായിരുന്നു മറുപടി. പിന്നൊന്നും നോക്കിയില്ല, ഹ്യുണ്ടായ് ക്രേറ്റയിൽ പോകാൻ തീരുമാനിച്ചു. അതി രാവിലെ വടക്കുംനാഥനെ തൊഴുത് തൃശ്ശൂരിൽ നിന്ന് ആരംഭിച്ച ആദ്യദിവസത്തെ യാത്ര 490 കിലോമീറ്റർ അകലെ പുതുച്ചേരിയിൽ അവസാനിച്ചു. തുടക്കത്തിലെ ആവേശവും നല്ല റോഡും യാത്ര അനായാസമാക്കി. പിറ്റേദിവസത്തെ യാത്ര ശിലകളിൽ കഥ മെനഞ്ഞ മഹാബലിപുരത്തെ പൈതൃകക്കാഴ്ചകളിലേക്കായിരുന്നു. പണ്ടെന്നോ സംഭവിച്ച പ്രകൃതി ക്ഷോഭത്താലോ മറ്റോ നശിച്ച സമ്പന്നമായ ഇന്ത്യൻ സംസ്കാരത്തിന്റെയും പൈതൃകത്തിന്റെയും, കാലത്തെ അതിജീവിച്ച ചെറിയൊരംശം മാത്രമാണ് ഇന്നവിടെ കാണുന്നത്. വൈകീട്ട് ആറോടെ മഹാബലിപുരത്തോട് വിടപറഞ്ഞു. വാഹനം പല റോഡുകൾ പിന്നിട്ട് എൻ.എച്ച്. 16-ലേക്ക് കയറി. രാത്രി പത്തോടെ ഒരു ടോളിൽ ടെന്റടിച്ച് കിടന്നു.

കൊൽക്കത്ത വരെ നീണ്ടുകിടക്കുന്ന ചെന്നൈ-കൊൽക്കത്ത എൻ.എച്ച്. 16-ലൂടെ 450 കിലോമീറ്റർ അകലെ വിജയവാഡയ്ക്കടുത്ത് ഉണ്ടാവല്ലി കേവ്സ് ആയിരുന്നു അടുത്ത ലക്ഷ്യം. ഇടയ്ക്ക് പണി നടക്കുന്നുണ്ടെങ്കിലും തീരേ ട്രാഫിക് ഇല്ലാതെ നീണ്ടുനിവർന്നു കിടക്കുന്ന ആറുവരിപ്പാത ഈ യാത്ര അനായാസമാക്കി. കൃഷ്ണ നദിക്ക് അഭിമുഖമായുള്ള മലഞ്ചെരിവിൽ പാറയുടെ ഓരോ വെട്ടിലും ഒരു കഥ സംസാരിക്കുന്ന ചരിത്രസൃഷ്ടികളുടെ അത്ഭുതമാണ് ഉണ്ടാവല്ലി ഗുഹകൾ. 330 കിലോമീറ്റർ അകലെ സൗത്ത് ഇന്ത്യയിലെ കശ്മീർ എന്നറിയപ്പെടുന്ന ലംബാസിംഗിയാണ് അടുത്ത ലക്ഷ്യം. അതിമനോഹരമായ ലാൻഡ്സ്കേപ്പിന് നടുവിലൂടെ അനന്തതയിലേക്ക് നീളുന്ന എൻ.എച്ച്. 16-ലൂടെ ആസ്വദിച്ചൊരു ഡ്രൈവ്. രാത്രി എട്ടോടെ ടുണി ഗ്രാമത്തിലെ ഒരു പെട്രോൾ പമ്പിൽ യാത ബ്രേയ്ക്കിട്ടു.