ദേ ഇവിടുണ്ട്...പ്രാഞ്ചിയേട്ടന്റെ പുണ്യാളൻ..

സിനിമയിലെ ചില ദൃശ്യങ്ങളിൽ കണ്ടുമറന്ന ഒരു പള്ളിയും അവിടുത്തെ പുണ്യാളനും. കാലങ്ങൾക്കുശേഷം ആ ദേവാലയം തേടിപ്പിടിക്കാൻ ഒരു യാത്ര

- C K RIMJU

കേരളത്തിലെവിടെയും കാണാത്ത ദൃശ്യചാരുതയുള്ള ആ പള്ളിക്കുള്ളിലെ മരബെഞ്ചിലിരുന്ന് പുണ്യാളൻ പ്രാഞ്ചിയോട് കണ്ണടയ്ക്കാൻ പറഞ്ഞു. അടഞ്ഞ കണ്ണിൽ പ്രാഞ്ചി കണ്ടു, ബാല്യകാലസഖിയുടെ അവിഹിതസംസാരം, തന്റെ പണം അപഹരിച്ച അജയ് നമ്പ്യാരെ ഇ.ഡി. പൊക്കിയത്, പറയാൻ ബാക്കിവെച്ച പ്രണയം തന്റെ പ്രണയിനി തന്നോട് പറയാനൊരുങ്ങുന്നത്...

പിരിയാൻ സമയമായെന്ന് പറഞ്ഞ പുണ്യാളനോട് പോളിക്ക് ഒരനുഗ്രഹം കൊടുക്കാൻ പറഞ്ഞു പ്രാഞ്ചി. അനുഗ്രഹം കുപ്പീലോ പാക്കറ്റിലോ കിട്ടുമെന്ന ബോർഡ് കണ്ടാൽ അവിടെ കയറി ക്യൂ നിൽക്കുമെന്ന്, മലയാളിയുടെ കപടവിശ്വാസത്തെ കളിയാക്കി പുണ്യാളൻ മറഞ്ഞു. പോളിയെ കൂട്ടിവന്ന പ്രാഞ്ചിക്കും അസീസിയിലെ സെന്റ് ഫ്രാൻസിസ് പുണ്യാളനെ പിന്നീട് കാണാനായില്ല. ഇരു കൈകളിലും വെള്ളരിപ്രാവുമായി നിൽക്കുന്ന പുണ്യാളന്റെ രൂപം പള്ളി ചുമരിനരികെ ഉയർന്നുനിന്നു.

ഗോവ തിരഞ്ഞെടുപ്പ് തിരക്കിലായിരുന്നു. ഇവിടെയുള്ള കാസിനോകളിലെ ചൂതാട്ടത്തിന്റെ ചൂര്, രാഷ്ട്രീയത്തിലും പടർന്നിട്ടുണ്ടന്നറിയാൻ അധികം സമയം വേണ്ടിവന്നില്ല. ഗോവൻ തിരഞ്ഞെടുപ്പ് വിശേഷങ്ങൾ റിപ്പോർട്ട് ചെയ്യുന്നതിനിടെയാണ് അരിപ്രാഞ്ചി ഓർമയിലേക്ക് കയറിവന്നത്. രഞ്ജിത്ത് മമ്മൂട്ടി കൂട്ടുകെട്ടിന്റെ സൂപ്പർഹിറ്റ് ചിത്രം "പ്രാഞ്ചിയേട്ടൻ ആൻഡ് ദി സെയിന്റി'ന്റെ ക്ലൈമാക്സ് രംഗം ചിത്രീകരിച്ചത് ഗോവയിലെ ഒരു പള്ളിയിൽ വെച്ചായിരുന്നു. കേരളം അതുവരെ കാണാത്തത്ര  ഭംഗിയുള്ളതായിരുന്നു ആ പള്ളി. അതിന്റെ ഉൾവശം, ശില്പങ്ങൾ, അന്തരീക്ഷം എല്ലാം ചേർന്ന്  ക്ലൈമാക്സിനെപ്പോലെത്തന്നെ വേറിട്ടൊരു ദൃശ്യഭംഗിയാണ് ആ പള്ളിയും പ്രേക്ഷകർക്ക് സമ്മാനിച്ചത്.