ഹിമശൈലമേറി ത്രിലോകിനാഥന്റെ മുന്നിൽ

വേനൽച്ചൂടിൽ മണാലിയുടെ തണുപ്പിലേക്ക്. മലയേറിച്ചെന്നത് ത്രിലോകിനാഥന്റെ ക്ഷേത്രമുറ്റത്ത്. ഹിന്ദു-ബുദ്ധിസ്റ്റ് വിശ്വാസികളുടെ സംഗമഭൂമിയിൽ.

- ARUN KALAPPILA

ഡൽഹിയിലെ ഉഷ്ണതരംഗത്തിൽ നിന്നൊരു ആശ്വാസമായിരുന്നു മണാലിയിലെ തണുപ്പ്. കശ്മീരി ഗേറ്റിൽ നിന്ന് പുറപ്പെട്ട സെമി സ്ലീപ്പർ വോൾവോ ബസ് ഡൽഹിയും ചണ്ഡീഗഢം കടന്ന് അർധരാത്രിയിലെപ്പോഴോ ഹിമാചലിലെ തണുപ്പിലേക്ക് വലിഞ്ഞുകയറുന്നതിന്റെ ആശ്വാസം പാതിമയക്കത്തിലും തിരിച്ചറിഞ്ഞു. ഇരുട്ടിൽ ശബ്ദം മാത്രമായി ഒഴുകുന്ന ബിയാസിന്റെ കരകളിലൂടെ പാഞ്ഞ ബസ് രാവിലെ എട്ടുമണിയോടെ മണാലിയിലെ നദിക്കരയിലെ പ്രൈവറ്റ്  ബസ് സ്റ്റേഷനിൽ എത്തി ച്ചേർന്നു.

ചണ്ഡീഗഢിൽ നിന്ന് മണാലിയിലേക്ക് നിർമിക്കുന്ന അതിവേഗ പാതയുടെ നിർമാണം അതിവേഗം പൂർത്തിയായിക്കൊണ്ടിരിക്കുന്നു. മലകളെ ചുറ്റിയും കൂറ്റൻ പാറക്കൂട്ടങ്ങൾ തുരന്നും നിർമിച്ചെടുക്കുന്ന സുന്ദരമായ പാത ഹിമാചൽ ടൂറിസത്തിന്റെ തലവര തന്നെ മാറ്റിമറിക്കുന്നു. അതിന്റെ ആദ്യഘട്ടമെന്ന നിലയിൽ പൂർത്തിയാക്കപ്പെട്ട ഒൻപത് കിലോ മീറ്റർ നീളമുള്ള അടൽ ടണൽ, റോത്താങ് എന്ന അതികഠിനമായ ചുരത്തെ മറികടന്ന് ലഡാക്കിലേക്കുള്ള സഞ്ചാരം സുഗമമാക്കുന്നു. ഡൽഹിയിലെ കഠിനമായ ചൂടുകാലത്തെ അതിജീവിക്കാനുള്ള ഭൂമിയായി തിരഞ്ഞെടുക്കപ്പെട്ട ഹിൽസ്റ്റേഷനുകളിൽ ഏറ്റവും പ്രധാനപ്പെട്ട ഇടമാണ് ഇപ്പോൾ മണാലി.

ഏതുകാലത്തും കാഴ്ചകൾ കൊണ്ട് നിറയുന്ന ഭൂമിയാണിത്. മഞ്ഞുകാലത്ത് വെളുത്ത തൂവൽ തൊപി വെച്ച കോണിഫറസ് മരങ്ങളുടെ നീണ്ട നിര. അതിനിടയിലൂടെ പറന്നിറങ്ങുന്ന മഞ്ഞിന്റെ പഞ്ഞിക്കെട്ടുകൾ കണ്ടുനിൽക്കുന്നതും ആ തണുപ്പ് കൊണ്ടു നിൽക്കുന്നതും സുഖകരമാണ്. മഞ്ഞുകാലം പിന്നിട്ടാൽ പിന്നെ വസന്തത്തിന്റെ, പൂക്കളുടെ, പഴങ്ങളുടെ സുന്ദരമായ വിളവെടുപ്പുകാലമെത്തും. ആപ്പിൾ, പീച്ച്, പ്ലം, ആപ്രിക്കോട്ട് അങ്ങനെ നീളുന്നു പഴത്തോട്ടങ്ങളുടെ പെരുമ. ഏപ്രിൽ മുതൽ നവംബർ വരെ തുടരുന്ന അക്കാലയളവിലാണ് ഇവിടേക്ക് സഞ്ചാരികളുടെ ഒഴുക്കുണ്ടാകുക. മേയ് മാസത്തിൽ സീസൺ തുടങ്ങിക്കഴിഞ്ഞാൽ പിന്നെ സാമാന്യം ചെലവ് കൂടാറുണ്ട്. വാഹനവാടക, ഹോട്ടൽ റൂമുകൾ, ഭക്ഷണശാലകൾ ഒക്കെ നിരക്ക് കൂട്ടിയിരിക്കും. മലകളുടെ തലപ്പുകളിൽ മഞ്ഞിന്റെ തൊപ്പി ചൂടി സു ന്ദരിയായ പ്രകൃതി വസന്തത്തിനൊപ്പം മനോഹരമായ കാഴ്ചകളാണ് സമ്മാനിക്കുന്നത്. അതുകൊണ്ടുതന്നെ സഞ്ചാരികളുടെ ബാഹുല്യം കൊണ്ട് മണാലിയിപ്പോൾ ശ്വാസം മുട്ടുന്നു. പട്ടണത്തിലെ ഓരോ ജങ്ഷനിലും അസാധാരണമാം വിധം വാഹനത്തിരക്ക്. വാഹനങ്ങളുടെ ഹോണടി ശബ്ദത്തിൽ മുങ്ങുന്ന പട്ടണം.