സോനാഗച്ചിയിലെ കെണി

സോനാഗച്ചി! ഏഷ്യയിലെ ഏറ്റവും വലിയ ചുവന്ന തെരുവ്. നിഗൂഢ ഗലികളിലൂടെയുള്ള രാത്രി നടത്തത്തിൽ ആരറിഞ്ഞു, ചെന്നുചാടുന്നത് ചിന്തിക്കാൻ പോലുമാകാത്ത ഒരു കെണിയിലേക്കാണെന്ന്...

- EMIL JOY

കൊൽക്കത്തയുടെ തെരുവുകളിലൂടെയുള്ള യാത്ര അനുസ്യൂതം തുടരുകയായിരുന്നു. നൂറ്റാണ്ടുകളുടെ പെരുമയും പഴക്കവും ചരിത്രവും അവയിലൊക്കെയും നിഴൽ വിരിച്ചിട്ടുണ്ടെന്നറിയാം. വിശ്രുത കലാകാരന്റെ മുതൽ പിടിച്ചുപറിക്കാരന്റെ വരെ പേരിൽ ആലേഖനം ചെയ്യപ്പെട്ട തെരുവിന്റെ കഥകൾ "എ ഹിസ്റ്ററി ഓഫ് കൽക്കട്ടാ സ്ട്രീറ്റ്സ്' എന്ന പുസ്തകത്തിൽ മലയാളിയായ ചരിത്രകാരൻ പി.ടി. നായർ കുറിച്ചിട്ടുമുണ്ട്. അങ്ങനെ കഥകളുറങ്ങുന്ന ഇടങ്ങളിലൂടെ നടന്നെത്തി വഴിമുട്ടി നിൽക്കുന്നത് കുപ്രസിദ്ധി ആർജിച്ചൊരു തെരുവിന്റെ കവാടത്തിലാണ്. പതിറ്റാണ്ടുകൾക്കു മുൻപ് ജീവിച്ചിരുന്ന സോനുള്ളയെന്നൊരു കൊള്ളക്കാരന്റെ കഥയാണ് ആ തെരുവിന്റെ പേരിലുറങ്ങുന്നത്. സോനാഗച്ചി. അവിടെയാണ് അർധരാത്രിയിൽ ഇനിയെന്തെന്നറിവില്ലാതെ അസ്തപ്രജ്ഞരായി നിൽക്കുന്നത്.

'യക്ഷി' വെളുപ്പിലുള്ള യൂണിഫോമണിഞ്ഞ പോലീസുകാർ ഭീഷണിയുടെ കണ്ണേറ് തട്ടിച്ച് തെരുവിന്റെ മൂലയിലേക്ക് തള്ളി നിർത്തുന്നു. ആ തെരുവ് വാഴുന്നവരാണ് തങ്ങളെന്ന മുഖഭാവവുമായി ഏതാനും പിന്നണിയാളുകൾ പോലീസുകാരോട് ചേർന്ന് ആക്രോശിക്കുന്നു. സോനുള്ളയെ പിൻപറ്റി കാലങ്ങൾക്കിപ്പുറവും പിടിച്ചുപറിക്കാർ പല വേഷങ്ങളിൽ ഇവിടെ വ്യാപരിക്കുന്നുണ്ടെന്നതിന് നേർസാക്ഷ്യം.