മലഞ്ചെരുവിലെ മായാലോകം ടീടെറൈൻ...

കുട്ടിക്കാനത്തിന്റെ കുളിരിൽ പ്രകൃതിയുടെ പച്ചപ്പിൽ കണ്ണും മനസ്സും ചേർത്ത് ചില രാപകലുകൾ. ടീ ടെറൈൻ റിസോർട്ടിലേയ്ക്ക് പോകാം. അവധിദിനങ്ങൾ ആഘോഷമാക്കാം

- SOORAJ SUKUMARAN

മുണ്ടക്കയത്തു നിന്ന് മലകയറി വണ്ടി കുട്ടിക്കാനത്ത് എത്തിയപ്പോൾ തന്നെ കോട പുതപ്പിട്ടു തുടങ്ങി. കുളിർക്കാറ്റ് വീശിയടിച്ച് ഞങ്ങളെ ആ മണ്ണിലേക്ക് സ്വാഗതം ചെയ്തു. കുട്ടിക്കാനം-കട്ടപ്പന റോഡിലൂടെ അൽപം സഞ്ചരിച്ചാൽ ഗ്ലെൻ മേരി റോഡിലേക്ക് തിരിയും. തേയിലത്തോട്ടങ്ങൾക്കും മൊട്ടക്കുന്നുകൾക്കും ഇടയിലൂടെ നീളുന്ന ഒറ്റവരിപ്പാതയിലൂടെയാണ് പിന്നെയുള്ള സഞ്ചാരം. അൽപദൂരം സഞ്ചരിച്ചാൽ തേയിലത്തോട്ടങ്ങൾക്കിടയിൽ മലഞ്ചെരുവിൽ അണിഞ്ഞൊരുങ്ങി നിൽക്കുന്ന ഒരു സുന്ദരിയെ പോലെ റിസോർട്ട് തെളിഞ്ഞുവരും.

പാമ്പനാറിന്റെ ദൃശ്യചാരുതയും തേയിലത്തോട്ടങ്ങൾ നിറഞ്ഞ ഗ്രാമീണതയും സംഗമിക്കുന്ന മലഞ്ചെരുവിൽ അന്താരാഷ്ട്ര നിലവാരത്തിലൊരു റിസോർട്ട്, ആദ്യ നോട്ടത്തിൽ തന്നെ ടീ ടെറൈൻ (TeaTerrain) ആരുടെയും മനം കവരുമെന്നുറപ്പ്. തേയിലത്തോട്ടങ്ങളും താഴ്ന്നിറങ്ങുന്ന കോടമഞ്ഞും ഗ്രാമക്കാഴ്ചകളുമെല്ലാം ഏറ്റവും മികച്ച രീതിയിൽ ആസ്വദിക്കാൻ പറ്റുന്ന രീതിയിലാണ് റിസോർട്ട് രൂപകൽപന ചെയ്തിരിക്കുന്നത്. റിസോർട്ടിനകത്ത് വരെ ടാറിട്ട റോഡാണ്. അതുകൊണ്ട് കുടുംബവുമൊത്ത് വളരെ സുരക്ഷിതമായി തന്നെ ഇവിടെ എത്തിച്ചേരാൻ സാധിക്കും.

റിസപ്ഷനിലെ ഹൃദ്യമായ വരവേൽപ്പിന് ശേഷം മനസ്സ് കുളിർപ്പിക്കുന്ന കാഴ്ചകളിലേക്ക് വാതായനങ്ങൾ തുറക്കുകയായി. മലഞ്ചെരുവിൽ പ്രകൃതിക്ക് ഏറ്റവും അനുയോജ്യമായ രീതിയിലാണ് ഇവിടത്തെ ഓരോ വില്ലകളും രൂപകൽപന ചെയ്തിരിക്കുന്നത്. എട്ട് ഏക്കറിൽ പരന്നുകിടക്കുന്ന റിസോർട്ടിൽ 16 എസ്റ്റേറ്റ് സ്യൂട്ട് റൂമുകൾ, രണ്ട് സ്വകാര്യ എസ്റ്റേറ്റ് വില്ലകൾ, നാല് സ്വകാര്യ എസ്റ്റേറ്റ് പൂൾ വില്ലകൾ എന്നിവയാണുള്ളത്. പ്രൈവറ്റ് പൂളുകൾ നിറഞ്ഞ പൂൾ വില്ലകൾക്ക് ചുറ്റും മുള കാടുകളും ചെടികളും കുട വിരിച്ചു നിൽക്കുന്ന കാഴ്ച മനംകവരുന്നത് തന്നെ.

എല്ലാ റൂമുകൾക്കും പാമ്പനാറിന്റെ ദൃശ്യചാരുതയിലേക്ക് വാതിൽ തുറക്കുന്ന ബാൽക്കണി സൗകര്യമുണ്ട്. ഏറ്റവും മികച്ച രീതിയിൽ സജ്ജീകരിച്ചിരിക്കുന്ന കിടപ്പുമുറികളും ലിവിങ് റൂമുകളും അതിഥികൾക്ക് നവോന്മേഷം പകരും.

പുതുപുത്തൻ റിസോർട്ട്

റിസോർട്ടിലെ ഏറ്റവും തനമായ ഇൻഫിനിറ്റി പൂൾ ഉല്ലാസത്തിനൊപ്പം പ്രകൃതിയെ തൊട്ടറിയാവുന്ന രീതിയിലാണ്.