ഇന്ത്യയുടെ ലാ ലാ ലാൻഡ്

 മനോഹരമായ ജലപാതങ്ങൾ, തടാകങ്ങൾ, അവയ്ക്കതിരിടുന്ന സ്വപ്നക്കുന്നുകൾ... മനോഹരമായ പ്രകൃതിയും ചരിത്രസ്മാരകങ്ങളും പ്രശാന്തമായ ആശ്രമങ്ങളും ഒക്കെ ചേർന്നതാണ് സിക്കിം. സഞ്ചാരികളുടെ തിക്കും തിരക്കുമില്ലാത്ത വെസ്റ്റ് സിക്കിമിലെ പെല്ലിങ്ങിന്റെ സൗന്ദര്യം കാണാം

- K J SIJU

ല എന്നാൽ "ഓകെ' എന്നാണ് ബൂട്ടിയകളുടെ ഭാഷയിൽ അർഥം. നേപ്പാളിയിൽ ‘ലാ ലാ' എന്ന് രണ്ടുതവണ ഉപയോഗിച്ച് കേൾക്കാം. "ഓകെ ഓകെ' എന്ന രീതിയിൽ. സിക്കിം യാത്രയിൽ ലാ ലാ കേൾക്കാതെ ഒരു സംഭാഷണവും കടന്നുപോകില്ല. “തങ്ങൾ ശാന്തശീലരാണ്, അതുകൊണ്ട് മൃദുവായി ഒരുതവണ 'ല' എന്ന് പറഞ്ഞാൽ മതി. നേപ്പാളികൾ കുറച്ച് അഗ്രസീവായതുകൊണ്ടാണ് അവർക്ക് രണ്ടുതവണ ല ല എന്ന് ‘ല പറയേണ്ടിവരുന്നത്'', പെല്ലിങ്ങിലെ ഒരു ബൂട്ടിയ തമാശയായി പറഞ്ഞു.

മഴയും വെയിലും മാറിമാറി വന്ന ഒരു ദിവസമാണ് പെല്ലിങ്ങിലെത്തിയത്. വിനോദസഞ്ചാര സീസൺ കഴിയാറായിരുന്നു. സിക്കിമിലെ മനോഹരമായ പ്രദേശമാണ് വെസ്റ്റ് സിക്കിം. നേപ്പാൾ അതിർത്തിയോട് ചേർന്ന് കിടക്കുന്ന ഭാഗം. താഷിഡിങ്, ഡെന്ററം, പെല്ലിങ്, യും, ഗീസിങ് എന്നിവയാണ് പ്രധാന സ്ഥലങ്ങൾ. സഞ്ചാരികളുടെ ബാഹുല്യമില്ലാത്ത പടിഞ്ഞാറൻ സിക്കിമിലെ മനോഹര ഇടമാണ് പെല്ലിങ്. സിക്കിമിലെ പലയിടങ്ങളിലേക്കും കടന്നുചെല്ലാൻ പെർമിറ്റുകൾ ആവശ്യമുണ്ടങ്കിലും അത്തരം പ്രയാസങ്ങളൊന്നുമില്ലാതെ ആർക്കും വണ്ടിയോടിച്ച് ഇവിടെയെത്താം. എങ്കിലും സ്ഥിരം യാത്രാ പാക്കേജുകളിൽ പെല്ലിങ് പ്രത്യക്ഷപ്പെടാറില്ല. ഡാർജിലിങ്, സിലിഗുരി എന്നിവിടങ്ങളോട് അടുത്തു കിടക്കുന്നതു കൊണ്ടാവാം ബംഗാളികളാണ് കൂടുതലും പെല്ലിങ് സന്ദർശിക്കുന്നത്. അനുകൂല കാലാവസ്ഥയിൽ കാഞ്ചൻജംഗ മലനിരകളുടെ മനോഹര കാഴ്ചയാണ് പെല്ലിങ്ങിന്റെ പ്രധാന ആകർഷണം. അപ്പർ, മിഡിൽ, ലോവർ എന്നിങ്ങനെ മൂന്ന് തട്ടുകളായാണ് പെല്ലിങ് സ്ഥിതിചെയ്യുന്നത്. ഒട്ടുമിക്ക താമസസൗകര്യങ്ങളും അപ്പർ മിഡിൽ പെല്ലിങ്ങുകളിലാണ് ഉള്ളത്.

ലോവർ പെല്ലിങ്ങിനും താഴെ, ഒരു ഗ്രാമത്തിലെ ഹോംസ്റ്റേയിലാണ് താമസിച്ചത്. നല്ല മഴ പെയ്തിരുന്നു. പ്രത്യേകിച്ച് ലക്ഷ്യമൊന്നുമില്ലാതെ വഴിയിലിറങ്ങി നടന്നു. മലഞ്ചരിവിലെ കൃഷിയിടത്തോട് ചേർന്നുള്ള കൊച്ചുവീടിന്റെ ഫോട്ടോ എടുക്കുമ്പോൾ വീട്ടുടമസ്ഥൻ ക്ഷണിച്ചു. വനംവകുപ്പിൽ ജോലിചെയ്യുന്നയാളാണ്. സിക്കിമിന്റെ ജീവിതവും ഭാഷകളും വിവിധ ബുദ്ധമത ശാഖകൾ തമ്മിലുള്ള വ്യത്യാസങ്ങളുമെല്ലാം അദ്ദേഹം വിവരിച്ചു. ഏലവും ചോളവും പച്ചക്കറികളുമൊക്കെ ധാരാളമായി പെല്ലിങ്ങിൽ കൃഷിചെയ്യുന്നു. വീട്ടാവശ്യം കഴിഞ്ഞ് ബാക്കിയുള്ളവ ചന്തയിൽ വിൽക്കും.