ചുരം കയറി ചുറ്റിവരാം

പാലക്കാടൻ കാറ്റിന്റെ കുളിരാസ്വദിച്ച്, നെല്ലിയാമ്പതി ചുരത്തിലെ കോടമഞ്ഞിൽ കുളിച്ച്, ഒരു ദിവസം...

- REESHMA DAMODAR

പാലക്കാടു നിന്ന് പോത്തുണ്ടി ചുരം കയറി നെല്ലിയാമ്പതിയിലേക്ക്, ആനവണ്ടിയിലൊരു വിനോദയാത്ര. എങ്ങനെയുണ്ടാകും? പാട്ട്, ഡാൻസ്, നല്ല ഭക്ഷണം, നിറമുള്ള കാഴ്ചകൾ... സാധാരണ ടൂർ പ്രോഗ്രാമുകളിലെ സ്ഥിരം ചേരുവകൾ ഇവിടെ പ്രതീക്ഷിക്കാമോ? മനസ്സിലെ ആശയും ആശങ്കകൾക്കും മേലേക്കാണ് നല്ല കുട്ടപ്പൻ ആനവണ്ടി വന്ന് ബ്രേക്കിട്ടത്.

രാവിലെ ആറുമണിയായപ്പോഴേയ്ക്കും യാത്രയ്ക്കായി മുൻകൂട്ടി ബുക്ക് ചെയ്തവരെല്ലാം എത്തിച്ചേർന്നിരുന്നു. പാലക്കാട് കെ.എസ്.ആർ.ടി.സി ഡിപ്പോയിൽ നിന്നും ആറരയ്ക്കാണ് ട്രിപ്പ് തുടങ്ങുക. ബസ്സിന്റെ മുന്നിൽ നിറയെ വർണബലൂണുകളും തോരണങ്ങളും തൂക്കിയിരിക്കുന്നു. ഉള്ളിൽ സ്പീക്കറും മൈക്കുമെല്ലാമുണ്ട്. സീറ്റുകളെല്ലാം പെട്ടെന്ന് നിറഞ്ഞു. എല്ലാവരും കയറിയെന്ന് ഒന്നുകൂടി ഉറപ്പുവരുത്തി, കണ്ടക്ടർ സുമതി ഡബിൾ ബെൽ കൊടുത്തു. ഡ്രൈവർ ചെന്താമരാക്ഷൻ ഗിയർ മാറ്റിയതോടെ, ബസ് മുന്നോട്ടേക്ക്...

ബജറ്റ് ടൂറിസം സെൽ ജില്ലാ കോർഡിനേറ്റർ കെ. വിജയ് ശങ്കർ മൈക്കിലൂടെ യാത്രക്കാർക്കുള്ള നിർദേശങ്ങൾ നൽകി. റൂട്ട് മാപ്പും മറ്റ് വിവരങ്ങളും കൃത്യമായി പറഞ്ഞു. ഈ റൂട്ടിലെ 170-ാം ട്രിപ്പാണിത്. അതുകൊണ്ടുതന്നെ ക്ലസ്റ്റർ ഓഫീസർ ടി.എ. ഉബൈദ്, ഇൻസ്പെക്ടർ പി. എസ്. മഹേഷ് എന്നിവരും ഒപ്പമുണ്ട്.

'റോഡിൽ തിരക്കാവുന്നതേയുള്ളൂ. എങ്കിലും പതുക്കെയാണ് ബസ് നീങ്ങുന്നത്. നെന്മാറ ടൗൺ എത്തുന്നതിനുമുൻപ്, ഒരു ചെറിയ കടയുടെ മുന്നിൽ ബസ്സൊതുക്കി. ഇവിടെയാണ് പ്രഭാത ഭക്ഷണം ഏർപ്പാടാക്കിയിരിക്കുന്നത്. പാളപ്പാത്രത്തിൽ നിരത്തിയ ഇഡ്ഡലിയും സാമ്പാറും ചമ്മന്തിയും നല്ല ചൂടുചായയും.

തുടർന്നുള്ള യാത്രയിൽ ബസ്സിലെ സ്ഥിരം യാത്രക്കാരനായ വർഗീസ് ചേട്ടൻ മൈക്ക് കൈയിലെടുത്തു. പിന്നീട് പരസ്പരമുള്ള പരിചയപ്പെടലിന്റെ സമയമായിരുന്നു. പാലക്കാട് ഐ.ഐ.ടി.യിൽ നിന്നുള്ള കുറേ കുട്ടികളും റിട്ടയർമെന്റ് ജീവിതം ആഘോഷമാക്കുന്ന ദമ്പതിമാരുമൊക്കെയാണ് യാത്രയിൽ കൂടുതലുമുള്ളത്.

നെന്മാറയിലെത്തിയപ്പോഴേക്കും ഇൻസ്പെക്ടർ ബൈജുവും ബസ്സിൽ കയറി. കലാഭവൻ മണിയുടെ നാടായ ചാലക്കുടിയിൽ നിന്നാണ് അദ്ദേഹത്തിന്റെ വരവ്. മണിയുടെ നാടൻ പാട്ടുകളുമായി ബൈജു കളത്തിലിറങ്ങിയതോടെ കൂടെയുള്ളവരും ഉഷാർ. “ഇവിടെയാണ് നെന്മാറ വല്ലങ്ങി വേല നടക്കുന്നത്. അപ്പോഴിവിടെ ജനസാഗരമായിരിക്കും'', നെല്ലിക്കുളങ്ങര ഭഗവതിക്ഷേത്രം ചൂണ്ടിക്കാണിച്ചുകൊണ്ട് സുമതിച്ചേച്ചി പറഞ്ഞുതന്നു.