മുറുക്ക് മണക്കുന്ന ഗ്രാമം

എണ്ണയിൽ മൊരിയുന്ന മുറുക്കിന്റെ മണമാണ് മണപ്പാറ എന്ന തമിഴ് ഗ്രാമത്തിന്. ഇവിടുത്തെ ഓരോ വീടുകൾക്കും പറയാനുണ്ട് മുറുക്കിന്റെ കഥകൾ

- VISHNU RAMAKRISHNAN

ചട്ടിയിൽ, എണ്ണയിൽ കുളിച്ച് പൊന്തിവരുന്ന ചൂടൻ മുറുക്കുകൾ. ചൂടാറാനായി കോരിവെച്ചതിൽ നിന്ന് ഒരെണ്ണം മെല്ലെ കൈയിലെടുക്കണം. പാതിചൂടോടെ മൊരിഞ്ഞ് മുറുക്കിൽ ഒരുകടി... വീണ്ടുമൊരു കടി... മാവും ജീരകവും എള്ളും ചേർന്ന ആ കൂട്ട് ഇങ്ങനെ നൊട്ടിനുണഞ്ഞിരിക്കുമ്പോൾ കിട്ടുന്ന സുഖം..! മുറുക്ക്, പോയകാലത്തിന്റെ രുചിയോർമകൾ ഉണർത്തുന്നു. രുചിവൈവിധ്യത്തിൽ ഭൗമസൂചികാപദവി സ്വന്തമാക്കാൻ ഒരുങ്ങുന്ന ഒരു മുറുക്കുഗ്രാമം തമിഴ്നാട്ടിലുണ്ട്. ഗൂഗിളിലൊന്ന് ചികഞ്ഞപ്പോൾ റൂട്ട് തെളിഞ്ഞു. തിരുച്ചിറപ്പള്ളി ജില്ലയിൽ തിരുച്ചിറപ്പള്ളി-ഡിണ്ടിഗൽ ദേശീയ പാതയോരത്താണ് മുറുക്കുകൾക്ക് പേരുകേട്ട മണപ്പാറ എന്ന ഗ്രാമമുള്ളത്. ഗ്രാമമെന്ന് വിശേഷിപ്പിക്കാമെങ്കിലും മുനിസിപ്പാലിറ്റിയെന്ന പദവിയുണ്ട് മണപ്പാറയ്ക്ക്.

ട്രിച്ചിയിൽനിന്ന് 40 കിലോമീറ്ററിൽ താഴെ ദൂരം! മംഗളൂരു-ചെന്നൈ എക്സ്പ്രസിൽ കയറിക്കൂടി. തിരക്കൊഴിഞ്ഞ വണ്ടിയിലിരുന്ന് പുറംകാഴ്ചകൾ കാണുമ്പോൾ തനത് മുറുക്കിന്റെ നിറവും രുചിയും കാത്തുവെച്ച് മണപ്പാറ ഗ്രാമത്തിലേക്കുള്ള വഴികൾ മനസ്സിൽ തെളിഞ്ഞു. പാലക്കാടൻ മണ്ണും മലനിരകളും പിന്നിട്ട് തീവണ്ടി തമിഴകത്തെത്തി.

തിരുച്ചിറപ്പള്ളി സ്റ്റേഷനിലേക്ക് ഇനിയെത്ര ദൂരമെന്ന് മണിക്കൂറുകളെണ്ണി കാത്തിരിക്കുമ്പോൾ പുറത്ത് ഇരുട്ട് പരന്നിരുന്നു. ചെറിയ മയക്കത്തിലേക്ക് വീണപ്പോൾ വണ്ടിയിൽ നിന്ന് ആളുകളുടെ നിർത്താതെയുള്ള സംസാരം. തിരുച്ചിറപ്പള്ളി എത്തിയിരിക്കുന്നു. മുറിയന്വേഷിച്ച് നടക്കുന്നതിനിടെ മണപ്പാറയിലെത്താനുള്ള വഴിയും ആരാഞ്ഞു.

മണപ്പാറയിലേക്കുള്ള ബസിനായി അധികം കാത്തു നിൽക്കേണ്ടി വന്നില്ല. ബസിൽ ഏതാനും സ്കൂൾ കുട്ടികളും ജോലിക്ക് പോകുന്ന ചെറുപ്പക്കാരും സ്ത്രീകളുമടങ്ങുന്ന യാത്രക്കാർ മാത്രം. നഗരം വിട്ടതോടെ തമിഴ് ഗ്രാമീണതയുടെ സൗന്ദര്യം പേറി പ്ലാസ്റ്റിക് കുടങ്ങളുമായി കൂട്ടത്തോടെ നടന്നുനീങ്ങുന്ന സ്ത്രീകളെ കാണാമായിരുന്നു. “മണപ്പാറയിലേക്ക് എത്ര ദൂരമുണ്ട്' എന്ന് കണ്ടക്ടറോട് തിരക്കിയപ്പോൾ അരമണിക്കൂറെടുക്കുമെന്നായി രുന്നു മറുപടി.

ചെറിയൊരു ഗ്രാമമാണ് മണപ്പാറ. ഇടയ്ക്കിടെ കാണുന്ന ഇരുനിലക്കെട്ടിടങ്ങൾ, ദേവാലയങ്ങൾ, പലഹാരക്കടകൾ...അടുക്കടുക്കായി വെച്ചിരിക്കുന്ന മുറുക്കുകടകൾ, ഓലമേഞ്ഞ ഇറച്ചിക്കടകൾ, നാലുഭാഗത്തേക്കും ചിതറിക്കിടക്കുന്ന ഇടവഴികൾ... ഇതാ മുറുക്കിന് പേരുകേട്ട മണപ്പാറ ഗ്രാമം.