ഒരു വസന്തകാലത്തിന്റെ ഓർമയിൽ

ദാൽ തടാകത്തിലൂടെ ഷിക്കാരയിൽ തുഴഞ്ഞ്... സോനാമാർഗിലെ മഞ്ഞുമഴയിൽ നനഞ്ഞ്...ട്യൂലിപ് പൂന്തോട്ടത്തിന്റെ ഭംഗിയിൽ വിസ്മയിച്ച് കശ്മീരിന്റെ മാറിലൂടെ ഒരു പെൺയാത്ര

- TEXT & PHOTOS: SHAREENA ANIL

കശ്മീർ എന്ത് സുന്ദരിയാണ്. ഓരോ തവണ ചെല്ലുമ്പോഴും ഓരോ  അനുഭവങ്ങൾ നൽകി ആ സ്വർഗഭൂമി യാത്രികരെ വശീകരിക്കും. സ്കൂളിൽ പഠിക്കുന്ന കാലത്ത് ടി.വിയിൽ കണ്ട് ഹിന്ദി സീരിയലിലാണ് ദാൽ തടാകത്തിലെ (അന്നത് ദാൽ തടാകം ആണെന്നറിയില്ലായിരുന്നു) ഒഴുകുന്ന ഉദ്യാനം, മാർക്കറ്റ്, മഞ്ഞുമൂടിയ വെള്ളി നിറമുള്ള മലകൾ തുടങ്ങിയവ മനസ്സിൽ പതിയുന്നത്. 'റോജ' കണ്ടതോടെ ആ സ്വർഗം മനസ്സിൽ പതിഞ്ഞു. പോകണം എന്ന ആഗ്രഹം കലശലായപ്പോൾ കൂട്ടുകാർക്കും കുടുംബത്തിനുമൊപ്പം ഒരു യാത്ര പ്ലാൻ ചെയ്ത് നടക്കാതെ ഇരിക്കുമ്പോഴാണ് ആമിക്കുട്ടിയുടെ My Travel Mate എന്ന ലേഡീസ് ഗ്രൂപ്പിന്റെ കൂടെ ആദ്യ കശ്മീർ യാത്രയ്ക്ക് അവസരം ലഭിച്ചത്. ഗ്രൂപ്പിൽ ആകെ അറിയുന്നത് കൊല്ലത്തുള്ള റംലടീച്ചറെ മാത്രമായിരുന്നു. ആദ്യം മടിച്ചെങ്കിലും കശ്മീർ എന്ന സ്വർഗത്തെക്കുറിച്ചുള്ള ചിന്തകൾ ഉറക്കം കെടുത്തിയപ്പോൾ മറ്റൊന്നും ചിന്തിച്ചില്ല.

കൂട്ടുകാർ, അമ്മമാർ, മക്കൾ, ബന്ധുക്കൾ അങ്ങനെ ഒരു പെൺപട തന്നെ കൂട്ടിനുണ്ടായിരുന്നു. കൊച്ചിയിൽ നിന്ന് ഡൽഹി വഴി ശ്രീനഗറിലേക്കുള്ള ഇൻഡിഗോ ഫ്ളൈറ്റിലായിരുന്നു യാത്ര. ശ്രീനഗർ എയർ പോർട്ട് അടുക്കാറായപ്പോൾ തന്നെ പോക്കുവെയിലേറ്റ് തിളങ്ങുന്ന വെള്ളി മലനിരകൾ കണ്ടു. കേക്കിന് അലങ്കാരത്തിനുള്ള വിപ്പിങ് ക്രീം അടിച്ച് റെഡിയാക്കി വെച്ച പോലെ തോന്നി അതുകണ്ടപ്പോൾ, വൈകുന്നേരത്തോടെ ആ സ്വപ്നഭൂമിയിൽ എത്തിച്ചേർന്നു. ഒരുപാടുനാളായി കാണാനാഗ്രഹിച്ച സ്ഥലത്താണ് കാലുകുത്തിയിരിക്കുന്നത്. സന്തോഷം കൊണ്ട് ഒന്നുറക്കെ കൂവിയാലോ എന്നുതോന്നി.

ദാലും പഹൽഗാമും

ആദ്യദിവസത്തെ താ മസം ദാൽ തടാകത്തിലെ ഹൗസ്ബോട്ടിലായിരുന്നു. ഓരോ ബോട്ടിലേക്കും ഉള്ളവരെ ഷിക്കാരകളിൽ (നമ്മുടെ നാട്ടിലെ ചെറിയ വള്ളങ്ങൾ) കൊണ്ടുപോയിക്കൊണ്ടിരുന്നു. ഷിക്കാരകൾ എല്ലാം തന്നെ തലയിണകൾ ഇട്ട് നിറമുള്ള തോരണംകൊണ്ട് അലങ്കരിച്ചവയായിരുന്നു. ഹൗസ്ബോട്ടുകൾ ഒഴുകി നടക്കുന്നവയായിരുന്നില്ല. കരയോട് ചേർന്നായിരുന്നു എല്ലാ ബോട്ടുകളും. ബോട്ടിന്റെ പുറകിൽ തന്നെയാണ് അതിലെ ജീവനക്കാരുടെയും വീടുകൾ ഉണ്ടായിരുന്നത്.