പുതുവർഷം പുതുയാത്രകൾ

"യാത്രകൾ പലപ്പോഴും അപ്രതീക്ഷിതമായിട്ടായിരിക്കും. സിനിമയുടെ ഇടവേളയിൽ മുന്നൊരുക്കങ്ങളൊന്നുമില്ലാതെ പുറപ്പെട്ടിറങ്ങുന്നതാണ് ശീലം...യാത്രാസ്വപ്നങ്ങളും അനുഭവങ്ങളുമായി നടൻ സണ്ണി വെയ്ൻ

അഭിനയം പോലെ സിനിമ നൽകുന്ന മറ്റൊരു സന്തോഷമാണ് യാത്ര. കഥാപാത്രങ്ങൾക്കായി അവരുടെ ജീവിതം അവതരിപ്പിക്കാനായി, കണ്ടിട്ടും കേട്ടിട്ടുമില്ലാത്ത നാടുകളിലേക്ക് പിടിക്കുന്നു. വേഗം കൂടിയ നഗരങ്ങൾ... ഇരുട്ടു കനക്കുമ്പോഴേക്കും ആളൊഴിയുന്ന ഗ്രാമങ്ങൾ... എവിടെയൊക്കെയോ ചെന്നുകയറുന്നു.

ചിലയിടങ്ങളിൽ എത്തിപ്പെടുമ്പോൾ ആ നാടും പരിസരവും അപരിചിതമായി തോന്നാറേയില്ല, അവിടെ പോയിട്ടില്ലെങ്കിലും അവിടത്തെ മനുഷ്യരും കാഴ്ചകളുമെല്ലാം എപ്പോഴൊക്കെയോ മനസ്സിൽ വന്നു പോയതായൊരു തോന്നലുയരും. ഓരോ സഞ്ചാരത്തിലും ഒരുപാട് ജീവിതങ്ങൾ കണ്ടു, കഥകളും അനുഭവങ്ങളും കേട്ടു. പാട്ടും നൃത്തവുമായി യാത്രകൾ ആഘോഷിക്കുമ്പോഴും ഓരോ നാടും നെഞ്ചോടുചേർത്തുവെച്ച് താളം പിടിച്ചെടുക്കാനാണ് മനസ്സെന്നും ശ്രമിച്ചത്.

അപ്രതീക്ഷിതമാണ് മിക്കയാത്രകളും. വീണുകിട്ടുന്ന ഒഴിവുദിവസങ്ങളിൽ പുറപ്പെട്ടിറങ്ങുന്നതാണ് രീതി. പുതുവർഷത്തിന്റെ തുടക്കവും യാത്രകൾക്കായി മാറ്റിവെക്കുകയാണ്. സിനിമാ തിരക്കുകൾക്കവധി നൽകി കാണാൻ കൊതിച്ച ഇടങ്ങളിലേക്ക് പറക്കാൻ മനസ്സു കൊണ്ടൊരുങ്ങി കഴിഞ്ഞു. പോകാൻ കൊതിക്കുന്ന ഇടങ്ങൾ പലതാണ്, അതുകൊണ്ടുതന്നെ പുതുവർഷത്തിലെ ആദ്യയാത്ര എങ്ങോട്ടെന്ന് തീരുമാനമായിട്ടില്ല.