ആലപ്രയുടെ അഴക്

മണിമലയുടെ സമസ്തസൗന്ദര്യവും പ്രകടമാകുന്നത് ആലപ്ര ഗ്രാമത്തിലാണ്. കാടും പാറക്കൂട്ടവും വെള്ളച്ചാട്ടങ്ങളും നിറഞ്ഞ ഗ്രാമഭംഗിയിലൂടെ

- Ananya G

കോട്ടയം നഗരമധ്യത്തിൽനിന്നുള്ള എരുമേലി-റാന്നി റൂട്ടിലെ യാത്ര പാതിവഴിയോടെ തിരക്കില്ലാത്ത റോഡിലേക്ക് കടക്കും. പിന്നീടങ്ങോട്ട് നാട് നേർക്കുന്നതും കാട് കനക്കുന്നതും കാണാം. മണർക്കാട്, വാഴൂർ, ചാമംപതാൽ കടന്നാൽ അടുത്തത് മണിമല. സഹ്യന്റെ പൊൻമുടിക്കെട്ട് പൊട്ടിച്ച് കുതിച്ചെത്തുന്ന മണിമലയാർ കോട്ടയം, ആലപ്പുഴ, പത്തനംതിട്ട ജില്ലകളുടെ പകിട്ട് കൂട്ടുന്നു. വലിയ കല്ലുകളുടെ നിരപ്പ് പിളർന്ന് റോഡിനോടുചേർന്ന് മണിമലയാർ നമുക്കൊപ്പം കൂടും. മഴക്കാലമല്ലാത്തതുകൊണ്ട് ചിലയിടത്തെല്ലാം നൂൽച്ചാല് പോലെയേ ആറുള്ളൂ.

കരിക്കാട്ടൂർ എത്തുമ്പോഴേക്കും റോഡിന്റെ മട്ടുമാറും. ഇരുവശത്തും കൂറ്റൻ മരങ്ങൾ കാവൽ നിൽക്കും. പൊന്തൻ പുഴ വനം തുടങ്ങിയെന്ന് തണൽ പറഞ്ഞുതരും.

ഇരുപതാം നൂറ്റാണ്ടിന്റെ തുടക്കത്തിൽ ട്രാവൻകൂർ ദിവാൻ മാധവ റാവു ആലപ്ര വലിയകാവ്-കരിക്കാട്ടൂർ പ്രദേശങ്ങൾ റിസർവ് വനമേഖലയായി പ്രഖ്യാപിച്ചിരുന്നു. സ്വതന്ത്ര കേരളത്തിലെ ആദ്യ സർക്കാർ ഇതിനെ ശരിവെച്ചു. വിവാദങ്ങൾ അവിടെ തുടങ്ങുകയായി. മഹാരാജാവ് മാർത്താണ്ഡവർമ ഈ ഭൂമി എഴുമാറ്റൂർ കോവിലകത്തിന് പട്ടയം നൽകിയിരുന്നതാണ്. കോവിലകം ഈ ഭൂമി സ്വകാര്യവ്യക്തിക്ക് വിറ്റു. അയാളത് മുറിച്ചുവിറ്റു. ഇങ്ങനെ പലവഴി മാറ്റം ചെയ്യപ്പെട്ട ഭൂമി റിസർവാക്കാൻ സർക്കാരിന് അവകാശമില്ലെന്നു കാണിച്ച് സ്വകാര്യവ്യക്തികൾ കോടതിയെ സമീപിച്ചു. പ്രദേശവാസികളുടെ ഉറക്കം കെടുത്തിക്കൊണ്ട് 2018-ൽ കോടതി അവരുടെ വാദം അംഗീകരിച്ചു. കോട്ടയം, പത്തനംതിട്ട ജില്ലകളിലായി പടർന്ന ഏഴായിരം ഏക്കർ പൊന്തൻപുഴ വനം അതോടെ സ്വകാര്യ ഉടമസ്ഥതയിലായി.