കടൽതാണ്ടിയെത്തും ശിശിരകാലാതിഥികൾ

അപൂർവമായി വിരുന്നെത്തുന്ന ദേശാടനക്കിളികളെത്തേടി യാത്ര. കടൽക്കാക്കകളും ആളച്ചിന്നനും പവിഴക്കാലിയുമെല്ലാം യാത്രികനെ ആനന്ദിപ്പി ക്കുന്നു. കാതങ്ങൾ താണ്ടിയെത്തുന്ന ശിശിരകാലസന്ദർശകർക്കൊപ്പം തീരങ്ങളിലൂടെ...

- AZEEZ MAHE

കടൽ മഹത്തായൊരു ജീവിത പ്രമാണമാണ്. അനന്തമായ ജലരാശിയുടെ അഗാധത കളിൽ പരശതം ജീവജനുസ്സുകളെ ഗർഭത്തിൽ വഹിക്കുന്ന അമ്മ, കടലമ്മയുടെ വിരിമാറിൽ തുടിച്ചു പറന്നും ചെറുമത്സ്യങ്ങളെ വേട്ടയാടിയും അറിയാത്തീരങ്ങളിൽ പ്രജനനം നടത്തിയും വൻപാറക്കൂട്ടങ്ങളുടെ നിഗൂഢത കളിൽ രാവുറങ്ങിയും അതിജീവനം തേടുന്ന പതംഗജാലചാരുതയും കടലിന്റെ ഓമനകൾ തന്നെ.

ഈ കടൽപ്പക്ഷിക്കൂട്ടങ്ങൾ, കടൽ പ്രക്ഷുബ്ധമാകുമ്പോഴോ ഭക്ഷണ ലഭ്യത കുറയുമ്പോഴോ കാലാവസ്ഥാ വ്യതിയാനങ്ങൾക്കനുസൃതമായോ, ചേക്കേറാച്ചില്ലകളില്ലാത്ത കടൽപ്പരപ്പ് താണ്ടി തീരംതേടിയെത്തുന്ന ദേശാടകരാണ്. അതിദീർഘപഥങ്ങൾ താണ്ടി കാനഡയിൽനിന്ന് തെക്കൻ അമേരിക്കൻ തീരങ്ങൾ വരെ പറന്ന ണയുന്ന ഫ്രാങ്ക്ലിൻസ് ഗൾ (Franklin's Gull) മുതൽ ഹ്രസ്വദൂരദേശാടകർ വരെ തീരം തേടിയെത്തുന്നു.

നവംബർ മുതൽ ഏതാണ്ട് മാർച്ച് മാസം വരെ യൂറോപ്പിന്റെയും ഏഷ്യയുടെയും വാസഗേഹം വിട്ട് കേരളതീരം തേടിയെത്തുന്ന ശിശിരകാലസന്ദർശകരായ (Winter visitors) കടൽപ്പക്ഷികളെത്തേടിയായിരുന്നു യാത്ര. ചാവക്കാട്ടെ പുത്തൻകടപ്പുറം മുതൽ, പൊന്നാനി വഴി, കടലുണ്ടി വരെ. കൂടെ പക്ഷിനിരീക്ഷണത്തിൽ അഗാധമായ അറിവുള്ള സുഹൃത്ത് ശശിധരൻ മനേക്കരയും. നിശ്ശബ്ദരായി, ഈ തീരം തങ്ങളുടെ സുരക്ഷിതതാവളമെന്നു കരുതി പറന്നെത്തുന്ന അതിഥികളെ ഒരുതരത്തിലും അലോസരപ്പെടുത്താതെയായിരുന്നു ഓരോ ചുവടും മുന്നോട്ടുവെച്ചത്.

ചാവക്കാടിന്റെ മണൽപ്പരപ്പിൽ നോക്കെത്താദൂരത്തോളം വ്യാപിച്ചു കിടക്കുന്ന വലിയ കടൽക്കാക്കകളുടെ (Greater black backed gull) വൻകൂട്ടത്തെ കണ്ടപ്പോൾത്തന്നെ മനസ്സിൽ ആഹ്ലാദത്തിരയുയരുകയായി ഇത്രയേറെ കടൽക്കാക്കകളെ മുൻപെങ്ങും നേരിട്ടുകാണാനായിട്ടില്ല. അറ്റ്ലാന്റിക് സമുദ്രത്തിലെ ഏതോ കൗഞ്ചദ്വീപിലെത്തിയ പ്രതീതി. കൂടെ കേരളതീരത്ത് ചെറുകൂട്ടങ്ങളായി മാത്രം വിരുന്നെത്തുന്ന ആളച്ചിന്നന്മാരും മംഗോളിയൻ മണൽക്കോഴികളും തെറ്റിക്കൊക്കൻമാരും ആറ്റുമണൽ കോഴിയും ചോരക്കാലിയും വാൾക്കൊക്കൻമാരുമെല്ലാമടങ്ങുന്ന വിരുന്നുകാർ, തദ്ദേശവാസികളായ തിരമുണ്ടിയും നീർക്കാക്കയും കാലിമുണ്ടിയും ചിന്നമുണ്ടിയുമെല്ലാം കൂട്ടത്തിലുണ്ടായിരുന്നു.