യേർക്കാട് പൂർവഘട്ടത്തിന്റെ ഉച്ചിയിൽ

പാവങ്ങളുടെ ഊട്ടി എന്ന വിളിപ്പേരുള്ള തമിഴ്നാട്ടിലെ യേർക്കാട് സഞ്ചാരികളെ മാടിവിളിക്കുന്നു

- ARUN P GOPI

 

ഏതോ യൂറോപ്യൻ ഗ്രാമത്തെ അനുസ്മരിപ്പിക്കുംവിധം, കാപ്പിത്തോട്ടങ്ങളും സിൽവർ ഓക്കുകളും നിറഞ്ഞ മലഞ്ചെരിവുകൾ മുന്നിൽ തെളിഞ്ഞപ്പോൾ ആശ്വാസം തോന്നി. കത്തിയെരിയുന്ന മാർച്ച് മാസത്തിൽ ഇത്തരമൊരു യാത്രയ്ക്ക് മുതിരേണ്ടതില്ലെന്ന ചിന്തയെ മായ്ച്ചു കളയുന്നതായിരുന്നു സെവറായൻ മലനിരകളിൽ കണ്ട പച്ചപ്പ്. പ്രഭാതത്തിൽ സേലം ബസ് സ്റ്റാൻഡിൽ നിന്ന് യേർക്കാട്ടേക്കുള്ള ബസ് കയറുമ്പോൾ സൂര്യൻ ഉച്ചസ്ഥായിയിലായിരുന്നു. എന്നാൽ, അവിടുത്തെ കാലാവസ്ഥ തണുപ്പുനിറഞ്ഞതായിരിക്കുമെന്ന് പലരും പറഞ്ഞത് ഞങ്ങൾക്ക് ആശ്വാസം പകർന്നു. സേലത്തിനോടുചേർന്ന് സ്ഥിതിചെയ്യുന്ന, പൂർവഘട്ടത്തിലെ സെവറായൻ മലനിരകളിൽപ്പെടുന്ന ഹിൽസ്റ്റേഷനാണ് യേർക്കാട്. സേലത്തു നിന്ന് യേർക്കാട്ടേക്ക് നീളുന്ന പാതയാണ് കാർട്ട് റോഡ്. കൊടും വളവുകളും അഗാധമായ കൊക്കകളും പാറക്കൂട്ടങ്ങളും വനങ്ങളും നിറഞ്ഞ ചുരംപാത. ഇരുപത് ഹെയർപിൻ വളവുകളാണ് ഈ പാതയുടെ പ്രധാന സവിശേഷത. ഓരോ വളവും പിന്നിട്ട് ബസ് ഹോൺ മുഴക്കി മലമുകളിലേക്ക് ഞരങ്ങി കയറിക്കൊണ്ടിരുന്നു. ഇടയ്ക്കിടെ വഴികാട്ടികളെപ്പോലെ പാതയ്ക്കരികിൽ തണൽ വിരിച്ചുനിൽക്കുന്ന മരങ്ങൾ, ആ തണലിൽ സഞ്ചാരികളെക്കാത്ത് കച്ചവടക്കാർ. വയനാടൻ ചുരത്തേക്കാൾ എത്രയോ വലുതാണ് ഇതെന്ന് ഓർത്തുപോയി. യേർക്കാട്ടേക്ക് സിൽവർ ഓക്കും കാപ്പിയും കൊണ്ടുവന്നത് ബ്രിട്ടീഷുകാരാണ്. ചുരത്തിൽ അങ്ങിങ്ങായി ബ്രിട്ടീഷുകാർ സ്ഥാപിച്ച പഴയ കോട്ടേജുകൾ പ്രൗഢിയോടെ ഇന്നും തലയുയർത്തി നിൽക്കുന്നു.