ജീവാംശം ഈ സംഗീതം

രാഗങ്ങളിൽ നിന്ന് രാഗങ്ങളിലേക്ക് സഞ്ചാരം തുടരുകയാണ് സംഗീതജ്ഞ ഡോ. കെ. ഓമനക്കുട്ടിയും ഗായകനായ കൊച്ചുമകൻ ഹരിശങ്കറും

-  പി. സനിത

നിശാഗന്ധിയിൽ പാട്ടുമഴ തോർന്നിട്ടില്ല. നൃത്തം ചെയ്തും മൊബൈൽ ടോർച്ചുകൾ മിന്നിച്ചും യുവത്വം സംഗീതമഴയിൽ നനഞ്ഞു. അവർക്കിടയിൽ അവരിലൊരാളായി ഗായകൻ ഹരിശങ്കർ. നിശാഗന്ധിയിൽ കോവിഡ് കാലത്തിനു ശേഷം ഹരിശങ്കറിന്റെ സ്വന്തം ബാൻഡ് പ്രഗതി ആദ്യമായി നടത്തിയ ഷോയാണ്. പുലർച്ചെ മൂന്നുമണിയോടെ പ്രോഗ്രാം കഴിഞ്ഞ് ബാൻഡംഗങ്ങളെല്ലാം തിരിച്ചുപോയി. കൊച്ചിയിലേക്കുള്ള മടക്കത്തിനു മുമ്പ് അമ്മയ്ക്കും അമ്മൂമ്മയും അനിയനുമൊപ്പം തിരുവനന്തപുരത്ത് ഹരിശങ്കറിന് ഒരു ഇടവേള.

പാട്ടിന്റെ വീട്

മെലഡി പാടി യുവാക്കളുടെ മനസ്സിൽ കയറിയ ഹരിശങ്കറിന്റെ കുടുംബത്തെ മലയാളിക്ക് അടുത്ത പരിചയമുണ്ട്. സംഗീതപാരമ്പര്യമുള്ള മേടയിൽ കുടുംബം'. പ്രശസ്ത കർണാടകസംഗീതജ്ഞ ഡോ.കെ. ഓമനക്കുട്ടിയാണ് അമ്മൂമ്മ. സ്വാതിതിരുനാൾ സംഗീതകോളേജിന്റെ പ്രിൻസിപ്പലും കർണാടക സംഗീതജ്ഞനും ആയിരുന്ന പരേതനായ ആലപ്പുഴ ശ്രീകുമാറാണ് അച്ഛൻ. അമ്മ കമലാലക്ഷ്മി വീണാധ്യാപിക. അനിയൻ രവിശങ്കർ വയലിനിസ്റ്റ്.

ഓമനക്കുട്ടിയുടെ സഹോദരൻ പ്രശസ്ത സംഗീതസംവിധായകൻ എം.ജി.രാധാകൃഷ്ണൻ, മറ്റൊരു സഹോദരൻ പ്രശസ്ത പിന്നണിഗായകൻ എം.ജി.ശ്രീകുമാർ.

പാട്ടിന്റെ വീട്

“നിശാഗന്ധിയിൽ ശങ്കു ഗംഭീരമായി പാടിയെന്നു കേട്ടു. ഒരു സുഹൃത്തിന്റെ പേരക്കുട്ടിയുടെ അരങ്ങേറ്റത്തിന് ചെല്ലാമെന്ന് നേരത്തേ ഏറ്റുപോയിരുന്നു. അതുകൊണ്ട് നേരിട്ടു കേൾക്കാൻ കഴിഞ്ഞില്ല.'' ഓമനക്കുട്ടി ടീച്ചർ പറഞ്ഞു. വീട്ടുകാർക്ക് ഹരിശങ്കർ ശങ്കുവാണ്.