ഹൃദയം തൊട്ട പിറവി

ഒന്നു പിഴച്ചാൽ അറ്റുപോകുന്ന രണ്ട് ജീവനുകൾ ഡോ. ഷോണിയ്ക്ക് മുന്നിൽ. അന്നോളം ജീവിതം സമ്മാനിച്ച കരുത്ത് കൈമുതലാക്കി അവരെടുത്ത തീരുമാനം ജ്യോതിയേയും മകനേയും മരണ മുനമ്പിൽ നിന്ന് കരകയറ്റിയ കഥയറിയാം...

- വി. പ്രവീണ

തൊട്ടിലിൽ നിന്നമ്മ നെഞ്ചോടു ചേർത്തപ്പോൾ അവൻ കുഞ്ഞിക്കണ്ണൊന്ന് ചിമ്മിയടച്ചു. തണുപ്പുടുപ്പിനുള്ളിൽ പുറത്തു പെയ്യുന്ന മഴയറിയാതെ ഉറക്കമാണ് കുരുന്ന്. “ഉഡ് ജാ ബേട്ടാ... ദേഖോ, കോൻ ആയാ ഹേ...'' അമ്മ അവനെ ഉണർത്താൻ ശ്രമിച്ചു. പകൽ കിനാവ് കുഞ്ഞുമുഖത്ത് ചിരിയായ് പടർന്നു. അമ്മയുടെ കൈകളിൽ നിന്ന് ഡോക്ടർ ഷോണി അവനെ നെഞ്ചോട് ചേർത്തു. “ബേട്ടാ കാ നാം ക്യാ ഹേ?'' ഡോക്ടർ ചോദിച്ചു. “ആയുഷ്''ജ്യോതി എന്ന അസം സ്വദേശിനിയായ ആ അമ്മ മറുപടി പറഞ്ഞു.

ജീവന്റെ നേർത്ത വരമ്പിൽ നിന്ന് അമ്മയ്ക്കൊപ്പം വഴുതിവീണതാണ് അവൻ. നിലച്ച ഹൃദയവുമായി പിറവി കാത്തുകിടന്ന പൂർണഗർഭിണിയിൽ നിന്ന് ഉയിരോടെ പുറത്തുവന്ന അത്ഭുത ശിശു. ആയുസ്സറ്റ് പോകേണ്ട ഇരുൾക്കടലിൽ നിന്ന് അമ്മയ്ക്കൊപ്പം ജീവന്റെ മറുകര താണ്ടിയ പോരാളി ജീവിതം മടക്കിനൽകിയ കൈകളിരുന്ന് ആയുഷ് ജീവന്റെ ചൂടറിഞ്ഞു. അരികിലിരുന്ന് അമ്മ, ഡോക്ടറെ ചേർത്തുപിടിച്ചു. “യേ ഭീ തേരാ മാ ഹേ. ഹസ് ലോ ബേട്ടാ...

“അന്നെനക്ക് ' എന്താ പറ്റിയത്? ഡോക്ടർ ഷോണിയുടെ കൈയിൽ മുറുകെപ്പിടിച്ച് അത് ചോദിക്കുമ്പോൾ വരുതിയിലാകാത്ത ഭാഷ പോലെ അവരുടെ ശബ്ദവും ഇടറിയിരുന്നു.

മറുപിള്ള വേർപെട്ട നിലയിൽ ആസ്പത്രിയിലെത്തിയ ജ്യോതിയെ അടിയന്തിര ശസ്ത്രക്രിയയ്ക്കായി ഓപ്പറേഷൻ തിയേറ്ററിലേക്ക് മാറ്റി. അവിടെവച്ചാണ് അവർക്ക് ഹൃദയസ്തംഭനം സംഭവിക്കുന്നത്. ഏതൊരു ഡോക്ടറേയും പ്രതിസന്ധിയിലാക്കുന്ന സമ്മർദനിമിഷം. ഒന്നു പിഴച്ചാൽ പാളിപ്പോകുന്ന രണ്ട് ജീവനുകൾ. ഭയവും ആശങ്കയും കൂടാതെ ചെയ്യാൻ കഴിയാത്ത പെരിമോർട്ടം സിസേറിയൻ തന്നെയാണ് അവസാനത്തെ അത്താണി എന്ന് ഉറപ്പിച്ച നിമിഷങ്ങൾ. ഡോക്ടർ ഷോണി സർജിക്കൽ ബ്ലേഡ് കൈയിലെടുത്തു. ഡോ. മെജോ, ഡോ.മൃദുല, ഡോ. തങ്കമണി, സ്റ്റാഫ് നഴ്സുമ്മാരായ സൗമ്യ, ഹസീന, സീനത്ത് എന്നിവരടങ്ങുന്ന സംഘം സഹായത്തിന് ഒപ്പം നിന്നു. ചോരവറ്റിയ ഗർഭപാത്രത്തിൽ നിന്ന് ഒരു കുഞ്ഞുജീവൻ പുറത്തെടുത്തു. ലേബർ റൂമാകെ അവന്റെ കുഞ്ഞിക്കരച്ചിൽ നിറഞ്ഞു.