കുറവുകളെ മറന്നുകളയുക

ഞാനത് ചെയ്താൽ ശരിയാവുമോ, എന്നെയെല്ലാവരും കളിയാക്കുമോ, ഞാൻ എല്ലാവരേക്കാളും മോശമാണോ? മനുഷ്യന് അപകർഷതയുണ്ടാക്കുന്ന ചില ചിന്തകളും പരിഹാരങ്ങളും

- ഷിനില മാത്തോട്ടത്തിൽ

 മനസ്സിന്റെ പാളികളിലെവിടെയോ മറഞ്ഞും തെളിഞ്ഞും വരുന്ന അപകർഷബോധം ഒരിക്കലെങ്കിലും നിങ്ങളെ ഭയപ്പെടുത്തിയിട്ടുണ്ടാവും. ഏറിയും കുറഞ്ഞും ഓരോ മനുഷ്യനിലും അപകർഷതയുണ്ട്. ഈയവസ്ഥയെ അകറ്റിനിർത്താനാവാതെ പാടുപെടുന്നവർ ഇക്കാര്യമൊന്നു ശ്രദ്ധിക്കൂ. അപകർഷതയ്ക്ക് കടിഞ്ഞാണിടാൻ വഴികളുണ്ട്. നിങ്ങളിൽ ഒളിഞ്ഞിരിക്കുന്ന പല കഴിവുകൾക്കും അതിനെ ഭേദപ്പെടുത്താനാവും. അപകർഷതയോട് മല്ലിട്ടാണ് ജീവിതനേട്ടങ്ങൾ കൈവരിച്ചതെന്ന് പല വിദഗ്ധരും തുറന്നു പറഞ്ഞിട്ടുണ്ട്. ജീവിക്കാനും നേടാനുമുള്ള വാശിയും ചവിട്ടുപടിയും തരുന്നുവെങ്കിൽ അപകർഷത നല്ലതുമല്ലേ..

സ്വയം മറ്റുള്ളവരുമായി താരതമ്യം ചെയ്തുനോക്കുന്നത് മനുഷ്യസഹജമായൊരു പ്രവണതയാണ്. എല്ലാവരെയും നോക്കി വിലയിരുത്തുന്നത് നല്ലതുതന്നെ. പക്ഷേ, മറ്റൊരാളുമായി തട്ടിച്ചു നോക്കി മാത്രം സ്വയം മാർക്കിടുന്നിടത്ത് അപകടമുണ്ട്. നമ്മുടേതായ രീതിയിൽ നമ്മൾ നല്ലതാണെന്ന കാര്യം മനസ്സിൽ വെക്കുക. എല്ലാം കൊണ്ടും പൂർണരാണെന്ന് തോന്നിപ്പിക്കുന്നവരിൽ പോലും സ്വയം വിലയിരുത്താനാവാത്തതിന്റെ പതറിച്ചയുണ്ടെന്ന് ശ്രദ്ധിച്ചാൽ നിങ്ങൾക്കു മനസ്സിലാവും.

അപകർഷതയെ മറികടക്കാൻ ചില പൊടിക്കൈകൾ

ബാഹ്യരൂപത്തെക്കുറിച്ച് അധികം ചിന്തിക്കരുത്

കാണാൻ എങ്ങനെയിരിക്കുന്നുവെന്ന് അമിതമായി ചിന്തിക്കാതിരി ക്കുമ്പോഴാണ് നിങ്ങൾക്ക് ഏറ്റവും തിളക്കത്തോടെ നിൽക്കാനാവുക. ആവശ്യമെന്നു തോന്നുന്നത് സ്വയം മെച്ചപ്പെടുത്തി വെക്കുക. പിന്നെയെല്ലാം സാഹചര്യങ്ങൾക്ക് വിട്ടേക്കണം. അടുത്ത സുഹൃത്തുക്കളോടോ വീട്ടുകാരോടോ വേണമെങ്കിൽ അഭിപ്രായം ചോദിക്കാം. പക്ഷേ ഒരു കാര്യം. അഭിപ്രായം ചോദിച്ചുകഴിഞ്ഞാൽ പിന്നെ അത് നല്ലതാണെങ്കിലും മോശമാണങ്കിലും കേൾക്കാനുള്ള ധൈര്യം കൂടി വേണം.

നിലവിലെ രൂപം മെച്ചപ്പെടുത്താൻ വേണമെങ്കിൽ ശ്രമിക്കാം