സഫലം ആ യാത്രാമൊഴി

സിസ്റ്റർ ലിനിയുടെ മക്കൾക്ക് അമ്മയായി, സജീഷിന്റെ നല്ലപാതിയായി പ്രതിഭ എത്തുന്നു...യാത്രാമൊഴിയിൽ ലിനി പറയാതെ പറഞ്ഞ മോഹം പോലെ...

- കെ.വി. കല

ഇനിയീ ഭൂമിയിലില്ലെന്നുറപ്പായ നിമിഷം യാത്രാമൊഴിയായി ഭർത്താവ് സജീഷിനെഴുതിയ കുറിപ്പിൽ രണ്ട് ആഗ്രഹങ്ങളാണ് ലിനി പങ്കുവെച്ചത്; “പൊന്നുപോലെ എന്റെ മക്കളെ നോക്കണം, നമ്മുടെ അച്ഛനെപ്പോലെ തനിച്ചാവരുത്. കഴിഞ്ഞ നാലുവർഷമായി കുഞ്ഞൂസിനും സിദ്ധുവിനും അച്ഛനുമമ്മയുമായി സജീഷ് കൂടെയുണ്ട്. ലിനി ആഗ്രഹിച്ചതിനേക്കാൾ സ്നേഹവാത്സല്യങ്ങൾ നൽകിക്കൊണ്ട്. ഇക്കാലമത്രയും കുട്ടികളല്ലാതെ മറ്റൊന്നുമില്ലായിരുന്നു ആ അച്ഛന്റെ മുന്നിൽ. ലിനി പറയാതെ പറഞ്ഞത് പൂരിപ്പിച്ചുകൊണ്ട് രണ്ടാമത്തെ ആവശ്യവും ഇപ്പോൾ നിറവേറ്റപ്പെട്ടിരിക്കുന്നു. പ്രതിഭയെന്ന കൂട്ടുകാരിയാണ് സജീഷിന്റെ ജീവിതപങ്കാളിയായെത്തിയത്. ലിനിയുടെ കുട്ടികൾക്ക് അമ്മയെ പോലെയല്ല, അമ്മതന്നെയായി. ഒപ്പം അവർക്ക് വല്യേച്ചിയായി പ്രതിഭയുടെ മകൾ ദേവപ്രിയയുമുണ്ട്. മക്കളുടെ അമ്മേ വിളികളാൽ ജീവസ്സുറ്റ വീട് കണ്ടു ലിനിയും സന്തോഷിക്കുന്നുണ്ടാവും.

നക്ഷത്രം സംസാരിച്ചുകൊണ്ടേയിരിക്കും... പ്രണയപൂർവം...സജീഷ്... എന്നെഴുതി ചില്ലിട്ടു തൂക്കിയ ലിനിയുടെ ചിത്രത്തിനു കീഴിലാണ് അവരഞ്ചുപേർ കുടുംബഫോട്ടോയ്ക്ക് പോസ് ചെയ്തത്. കൂടെ ലിനികൂടി വേണമെന്നവർക്ക് നിർബന്ധമായിരുന്നു.

ലിനിയില്ലാത്ത നാലുവർഷം