സർവ്വം സദാ ദർശനാ...

നിറഞ്ഞ ചിരിയുമായി മലയാളികളുടെ ഹൃദയത്തിൽ പതിഞ്ഞ പരിചിതമുഖം...ദർശന രാജേന്ദ്രൻ...

- വിഷ്ണു രാമകൃഷ്ണൻ

ബാവ് രമൻ ദേഖ്നെ ചലാ ഏക് സപ്നാ... മായാനദി'യിൽ വളരെ മനോഹരമായി, മധുരമായി പാട്ടുപാടിയ പെൺകുട്ടി. ഒത്തിരി ചുറുചുറുക്കും ഇത്തിരി കുട്ടിത്തവും കാത്തുസൂക്ഷിക്കുന്ന അവളെ വളരെ പെട്ടെന്നാണ് എല്ലാവരും ശ്രദ്ധിച്ചത്. അത്ര സ്വാഭാവികമായിരുന്നു അവളുടെ ഓരോ ചലനവും. ഇരുത്തം വന്നൊരു അഭിനേത്രി അവളിൽ പലപ്പോഴും മിന്നിത്തെളിഞ്ഞു. മലയാളസിനിമയ്ക്ക് ഏതുവേഷങ്ങളും തൻമയത്വത്തോടെ അഭിനയിച്ചു ഫലിപ്പിക്കാൻ കഴിയുന്ന മറ്റൊരു നടിയെക്കൂടി കിട്ടി, ദർശന രാജേന്ദ്രൻ. 2014-ൽ ജോൺ പോൾ വാതിൽ തുറക്കുന്നു' എന്ന ചിത്രത്തിലൂടെ മലയാളത്തിൽ അരങ്ങേറ്റം കുറിച്ച, ദർശന ഒന്നുരണ്ട് തമിഴ് സിനിമകൾക്കുശേഷമാണ് മായാനദിയിലെത്തുന്നത്. പിന്നീട് വിജയ് സൂപ്പറും പൗർണ്ണമിയും, വൈറസ്, കൂടെ, സീ യൂ സൂൺ, ആണും പെണ്ണും തുടങ്ങിയ ചിത്രങ്ങളിലൂടെ ദർശന മലയാളത്തിൽ സജീവമായി. ഹൃദയം സിനിമ പുറത്തിറങ്ങിയപ്പോൾ മലയാളിയുടെ ചുണ്ടിൽ ആ പാട്ട് പതിഞ്ഞു പോയി, "ദർശനാ... സംസാരിക്കുമ്പോൾ സിനിമയിലെ കഥാപാത്രങ്ങളെ പോലെ കുട്ടിത്തവും പ്രസരിപ്പും ദർശനയിൽ മിന്നിമറയുന്നു.

ഫ്രണ്ട്ലി ബേസിൽ

മായാനദി, ഡിയർ ഫ്രണ്ട് തുടങ്ങിയ ചിത്രങ്ങളിലൂടെ ബേസിൽ ജോസഫ്-ദർശന കോമ്പോ പ്രേക്ഷക മനസ്സിൽ ഇടംപിടിച്ചിരുന്നു. ഏറ്റവും പുതിയ ചിത്രമായ ജയ ജയ ജയ ജയഹേയിലും ഈ ജോഡി സൂപ്പർ ഹിറ്റായി. ബേസിലിനൊപ്പം ജോലി ചെയ്യുമ്പോൾ മികച്ച കെമിസ്ട്രി രൂപപ്പെടുന്നുവെന്ന് ദർശന സമ്മതിക്കുന്നു.