കുഞ്ഞുവാവയ്ക്ക് മരുന്ന് കൊടുക്കുമ്പോൾ

കുഞ്ഞുങ്ങൾക്ക് മരുന്ന് കൊടുക്കുമ്പോൾ ശ്രദ്ധിക്കണം ഏറെക്കാര്യങ്ങൾ

- പി.വി.സുരാജ്

കുഞ്ഞുവാവയ്ക്ക് അസുഖം വന്നാൽ ടെൻഷനടിക്കുന്നത് കുടുംബം മുഴുവനാണ്. ചെറിയ അസുഖം വന്നാൽ പോലും കുട്ടികൾ കളിചിരി നിർത്തി കണ്ണീരിലേക്കും കരച്ചിലിലേക്കും പോകും. മരുന്ന് നൽകി അസുഖം മാറ്റുക എന്നതാണ് അടുത്ത മാർഗം. എന്നാൽ മരുന്ന് വെറുതേയങ്ങ് കൊടുത്താൽപോര. അതിന്റെ അളവിലും കൊടുക്കുന്ന രീതിയിലുമെല്ലാം ശ്രദ്ധവേണം.

അളവ് മറക്കല്ലേ

കുഞ്ഞുങ്ങളുടെ തൂക്കമനുസരിച്ചാണ് ഔഷധപ്രയോഗം എന്നതിനാൽ ചെറിയ അളവു വത്യാസങ്ങൾ പോലും അവരുടെ ആരോഗ്യത്തെ ബാധിച്ചേക്കും. മരുന്നുകൾ കൃത്യമായഅളവിൽ നൽകാൻ ശ്രദ്ധവേണം.

ഒരു ടീസ്പൂൺ എന്നു പറഞ്ഞാൽ വീട്ടിലെ ഏതെങ്കിലും സ്പൂണല്ല, മറിച്ച് 5 മില്ലി ലിറ്റർ (5 ml ) ആണ് എന്ന കാര്യം ഓർക്കണം.

മിക്കവാറും മരുന്നു കുപ്പികളോടൊപ്പം മരുന്ന് അളന്നു നൽകുവാനുള്ള 5-10മില്ലിലിറ്ററിന്റെ ചെറിയ പ്ലാസ്റ്റിക് അളവുപാത്രങ്ങളും ഉണ്ടാവാറുണ്ട്.

ഒരു മില്ലി ലിറ്റർ 16 തുള്ളികളാണ് എന്ന വസ്തുത ഓർക്കുന്നതും ഒരു വയസ്സിനു താഴെയുള്ള കുട്ടികൾക്ക് മരുന്നു നൽകുമ്പോൾ പ്രധാനമാണ്.

ഡ്രൈ പൗഡർ ആയി കുപ്പികളിൽ ലഭിക്കുന്ന മരുന്നുകൾ, അവയോടൊപ്പം ലഭിക്കുന്ന ശുദ്ധജലമോ അതല്ലെങ്കിൽ തിളപ്പിച്ചാറിയ വെള്ളമോ കൃത്യമായ അളവിൽ ഒഴിച്ച് ലായനിയാക്കി മാറ്റണം. മരുന്നു ലായനിയിൽ എത്ര വെള്ളം ചേർക്കണം എന്ന് കുപ്പിയിൽ പാക്കറ്റിൽ രേഖപ്പെടുത്തിയിരിക്കും.

മടി കാണിച്ചാൽ

മരുന്നു കഴിക്കാനുള്ള കുട്ടികളുടെ മടി പലപ്പോഴും അവയുടെ സ്വാദുമായി ബന്ധപ്പെട്ടായിരിക്കും. കള്ളതോ ചവർപ്പുള്ളതോ ആയ മരുന്നുകൾ കുട്ടികൾക്ക് താരതമ്യേന ഇഷ്ടമാവില്ല.

മധുരമുള്ള മരുന്നുകൾ ഇഷ്ടംപോലെ ലഭ്യമാണെന്നതു കൊണ്ടു തന്നെ മധുരമുള്ള മരുന്നുകൾ വേണം എന്ന് ഡോക്ടറോട് പറയാൻ മടിക്കരുത്.

“മരുന്നുകൾ' എന്ന ഭാവത്തിൽ നൽകിയാൽ കുട്ടികൾ പലപ്പോഴും മധുരമുള്ള മരുന്നുകൾ പോലും കുടിക്കാൻ മടി കാണിക്കുന്നതായി കാണാറുണ്ട്. അതുകൊണ്ട് മറ്റു പാനീയങ്ങളും ഇഷ്ടഭക്ഷണങ്ങളും നൽകുമ്പോൾ ഭാവഭേദം കൂടാതെ മരുന്നുകൾ നൽകുന്നതാവും നല്ലത്.