പെപ്പെയും പിള്ളേരും

കാത്തിരിപ്പിനൊടുവിൽ കുട്ടിപ്പട്ടാളത്തിന് നടുവിലേക്ക് പെപ്പെയെത്തി. പിന്നീട് അവിടെ നടന്നത് അടിപിടിപൂരം

- റീഷ്മ ദാമോദർ

കൊച്ചി മാതൃഭൂമി സ്റ്റുഡിയോയിലേക്ക് കയറുമ്പോഴേ കേൾക്കാം, കുട്ടിപ്പട്ടാളത്തിന്റെ ബഹളം. പുതിയ കുപ്പായമിട്ട്, മേക്കപ്പ് ചെയ്തശേഷമുള്ള ഓട്ടമാണ്. ഇത്തിരി നേരത്തിനുള്ളിൽ അവർ ഒത്തിരി കൂട്ടായി. കുട്ടിക്കുറുമ്പുകളെ കണ്ടപ്പോഴേക്കും പെപ്പെയും ഫുൾ വൈബിലായി. മേക്കപ്പിനിടയിൽ പെപ്പെ വിശേഷങ്ങളോരോന്നും പങ്കുവെച്ചു. “പുതിയ സിനിമയുടെ ഷൂട്ടിങ് നടക്കുകയാണ്. ആർ.ഡി.എക്സ്. എന്നാണ് പേര്. ഷെൻ നിഗവും നീരജ് മാധവുമൊക്കെയുണ്ട് സിനിമയിൽ.

റിലീസ് ചെയ്യാനുള്ളതോ?

ആദ്യം റിലീസ് ചെയ്യുന്നത് വിനീത് വാസുദേവൻ സംവിധാനം ചെയ്ത പൂവൻ ആയിരിക്കും. ഒരു സാധാരണക്കാരനായ പയ്യനെ ചുറ്റിപ്പറ്റിയുള്ള കഥയാണത്. പിന്നെ ടിനു ചേട്ടന്റെ (ടിനു പാപ്പച്ചൻ) ചാവേർ എന്ന പടവുമുണ്ട്. ചാക്കോച്ചനും അർജുൻ അശോകനുമൊക്കെയാണ് സിനിമയിലുള്ളത്. ഒരു ത്രില്ലറാണ്.

അങ്കമാലി ഡയറീസ് ഇറങ്ങിയിട്ട് അഞ്ച് വർഷമായി. അഭിനേതാവായപോൾ ആ പഴയ അങ്കമാലിക്കാരന് എന്തെങ്കിലും മാറ്റമുണ്ടായോ?

ഹേയ്...ഒരിക്കലുമില്ല. സിനിമയോടുള്ള എന്റെ സമീപനത്തിൽ മാറ്റമുണ്ടായിട്ടുണ്ട്. കാരണം, അതു വരെ സിനിമ എന്നത് എനിക്കൊരു സ്വപ്നമായിരുന്നു. പക്ഷേ ഇപ്പോൾ സിനിമയെ കൂടുതൽ സീരിയസ്സായി കാണുന്നുണ്ട്. പിന്നെ നാട്ടിലൊക്കെ നടനാകണമെന്ന ആഗ്രഹവുമായി നടന്ന സിൽമാനടനായിരുന്നു ഞാൻ. ഇപ്പോൾ ശരിക്കും സിനിമാനടനായി. (ചിരിക്കുന്നു. ആളുകൾ തിരിച്ചറിഞ്ഞു തുടങ്ങി. കുറേ രാജ്യങ്ങൾ കാണാൻ പറ്റി. അല്ലാതെ വേറെ മാറ്റങ്ങളൊന്നുമുണ്ടായിട്ടില്ല. അങ്കമാലി ഡയറീസി'ൽ അഭിനയിക്കാൻ വരുമ്പോൾ ഒന്നുമറിയില്ലായിരുന്നു. ലിജോ ചേട്ടനാണ് പഠിപ്പിച്ചുതന്നത്. ഒരു സംവിധായകന്റേതായ അധികാരമൊന്നും അദ്ദേഹം കാണിക്കാറില്ല. പുള്ളിയെപ്പോഴും പറയും, വീട്ടിലും നാട്ടിലും നിങ്ങളെന്താണോ കാണിക്കുന്നത്, അതുപോലെ അങ്ങട് ചെയ്താൽ  മതി' എന്ന്. സിനിമയിലെ എന്റെ ഗുരുവും വഴികാട്ടിയുമാണ് ലിജോ ചേട്ടൻ.