മിമിക്രിയിലെ പെർഫെക്ഷൻ കിങ്

'വിക്രം' സിനിമയിൽ വിജയ് സേതുപതിക്കും കമലഹാസനുമടക്കം ഏഴ് താരങ്ങൾക്ക് വേണ്ടി മലയാളം പറഞ്ഞ മിമിക്രി ആർട്ടിസ്റ്റാണ് മഹേഷ് കുഞ്ഞുമോൻ

- ഷിനില മാത്തോട്ടത്തിൽ

മിക്രിയിലെ പെർഫെക്ഷൻ കിങ്' എന്നാണ് ആരാധകർ മഹേഷ് കുഞ്ഞുമോനിട്ട പേര്. ഗൗരവം വിടാതെ മോദിയെ പാട്ട് പഠിപ്പിക്കുന്ന പിണറായി വിജയനായും പാട്ടേറ്റു പാടുന്ന മോദിയായും മഹേഷ് സ്വരം മാറ്റിയപ്പോൾ, കേട്ടവർ കേട്ടവർ കണ്ണുമിഴിച്ചു. എന്തൊരു പെർഫെക്ഷൻ'. ആ വീഡിയോ പ്രേക്ഷകർ ഏറ്റെടുത്തതോടെ ഞൊടിയിടയിൽ വൈറലായി. മഹേഷിന്റെ ജീവിതത്തിൽ അതൊരു തുടക്കമായിരുന്നു. പിന്നീട് സിനിമയിൽ വിജയ് സേതുപതിയുടെയും സൂര്യയുടെയും കമലഹാസന്റെയുമൊക്കെ ശബ്ദമായിമാറിയ വിജയയാത്രയെക്കുറിച്ച് പുത്തൻകുരിശുകാരനായ മഹേഷ് മനസ്സ് തുറക്കുന്നു.

“ചേട്ടൻ അജേഷിന്റെ മിമിക്രി കണ്ടാണ് ഞാനും രംഗത്തിറങ്ങുന്നത്. കൊറോണക്കാലത്ത് ചേട്ടന്റെയും സുഹൃത്തുക്കളുടെയും പ്രേരണയിൽ “മഹേഷ് മിമിക്സ്' എന്ന പേരിൽ യൂ ട്യൂബ് ചാനൽ തുടങ്ങി. ആ പേരിട്ടതും ചേട്ടൻ തന്നെ. കുറേ വീഡിയോകൾ ചെയ്തെങ്കിലും മോദിയുടെയും പിണിറായി വിജയന്റെയും ശബ്ദമനുകരിച്ച 'പെർഫെക്റ്റ് ഓക്കെയാണ് കരിയറിൽ വഴിത്തിരിവായത്.

നമ്മുടെ പെർഫോമൻസ് നന്നായിട്ടില്ലെങ്കിലും അടിപൊളിയായിട്ടുണ്ടന്നേ, കൂട്ടുകാരൊക്കെ പറയൂ. പക്ഷേ, ചേട്ടനെപ്പോഴും തിരുത്തിക്കൊണ്ടിരിക്കും. എന്നെ ആളുകളറിഞ്ഞ വൈറൽ വീഡിയോകൾക്കെല്ലാം പിന്നിലവനുണ്ട്. എന്തെങ്കിലും പുതുതായി പഠിച്ചാൽ ആദ്യം ചേട്ടന് മുന്നിലവതരിപ്പി ക്കും. അവൻ കൊള്ളാമെന്നു പറഞ്ഞാലേ, വീഡിയോകൾ യൂട്യൂബിലേക്കിടാറുള്ളൂ

 വിനീത് ശ്രീനിവാസനും മഹേഷും

വിനീത് ശ്രീനിവാസനെ അനുകരിച്ചാണ് തുടക്കത്തിൽ മഹേഷ് ഏറ്റവും കൂടുതൽ കൈയടി വാങ്ങിയത്. ശബ്ദം അനുകരിച്ചനുകരിച്ച് അദ്ദേഹവുമായി രൂപസാദൃശ്യം തോന്നാറുണ്ടെന്ന് പലരും മഹേഷിനോട് പറഞ്ഞിട്ടുണ്ട്.

“വിനീതേട്ടന്റെ ശബ്ദം സൂക്ഷ്മമായി നിരീക്ഷിച്ച് പഠിച്ചൊരാളല്ല ഞാൻ. അദ്ദേഹവുമായി മാച്ചായിട്ടുള്ളാരു ടോണാണെനിക്ക്. എപ്പോഴും മൂക്കിങ്ങനെ ഞെക്കിഞെക്കി ആദ്യമൊക്കെ അനുകരിച്ചു നോക്കി. പലരും നല്ല അഭിപ്രായം പറഞ്ഞു. ഒരേ ആളെ കുറെ തവണ അനുകരിക്കുമ്പോൾ, അയാളുടെ രീതികൾ താനേ വരുമെന്ന് തോന്നുന്നു. എന്റെയും വിനീതേട്ടന്റെയും ജന്മദിനം ഒക്ടോബർ ഒന്നിനാണ്. പിണറായി സാറിനെ തുടർച്ചയായി അനുകരിക്കുന്ന സമയത്ത് അദ്ദേഹത്തെ എന്നിൽ കാണുന്നുവെന്ന് കൂട്ടുകാരൊക്കെ പറഞ്ഞിട്ടുണ്ട്.

വിജയ് സേതുപതിയുടെ മലയാളം