સીઈઓ અને ફાઉન્ડર, શુગર કોસ્મેટિક્સવિનીતા સિંહ: પ્રથમ સ્ટાર્ટઅપમાં નિષ્ફળ જવા છતાં પણ વિનિતાનો આત્મવિશ્વાસ ન ડગ્યો અને જન્મ થયો શુગર કોસ્મેટિક્સનો..

વિનીતા ખૂબ સારી વ્યવસાયી હોવાની સાથે એક સારી એથ્લીટ પણ છે

૨૩ વર્ષની ઉંમરમાં ૧ કરોડનું વાર્ષિક પેકેજ દરેક યુવાનનું સપનું હોય છે, પરંતુ કેટલાક યુવા એવા હોય છે જેમના સપના આ પેકેજથી ઘણા મોટા હોય છે. દિલ્લીમાં જન્મેલી વિનીતા સિંહ એવી જ યુવા વ્યવસાયી છે જેમણે પોતાની ઓળખ પોતાની મહેનતથી બનાવવાનું નક્કી કર્યું. પ્રથમ સ્ટાર્ટઅપ્સમાં સફળ ન થવા છતાં પણ વિનીતાનો આત્મવિશ્વાસ ન ડગ્યો અને પછી આ રીતે શુગર કોસ્મેટિક્સનો જન્મ થયો.

વિનીતાનો જન્મ ૧૯૯૧માં દિલ્લીમાં થયો. તેમના પિતા તેજ સિંહ એમ્સના વૈજ્ઞાનિક હતા. વિનીતાએ દિલ્લી પબ્લિક સ્કૂલમાંથી અભ્યાસ કર્યો અને સ્નાતક કરવા માટે આઈઆઈટી મદ્રાસ જતા રહ્યા. તે પછી તેમણે આઈઆઈએમ અમદાવાદથી એમબીએની ડિગ્રી મેળવી. વિનીતાના પતિ કૌશિક મુખર્જી છે. બંનેની મુલાકાત એમબીએ કરવા દરમિયાન થઈ હતી અને ૨૦૧૧માં બંનેએ લગ્ન કર્યા. સ્ટાર્ટઅપના શરૂઆતના સમયને યાદ કરતા વિનીતા જણાવે છે, “એકવાર એક ઈન્વેસ્ટરે મને મળવાની ના પાડી દીધી હતી, કારણ કે તે માત્ર એક પુરુષને મળવા ઈચ્છતા હતા. મેં આ બધાની ચિંતા ન કરી અને એ નિર્ણય કર્યો કે હવે હું નહીં મારું કામ બોલશે.’’