தொடரும் இயற்கை சீற்றங்கள்!

நாம் அறிந்த இயற்கை சீற்றங்கள்தாம் என்றாலும், எதிர்பாராதவிதமாக திடீரென ஏற்பட்டு நம்மை அதிர்ச்சி க்குள்ளாக்கும் சம்பவங்கள்... காலநிலை மாறுபாடு ஏற்பட்டுவிட்டதை எச்சரித்துக் கொண்டே இருக்கின்றன. அவற்றில் ஒன்று புழுதிப்புயல்.

- நெல்லைபரிதி

சில நாட்களுக்கு முன்பு மும்பையில் தானே, பால்கர் உள்ளிட்ட பல்வேறு இடங்களில் புழுதிப்புயல் வீசி மக்களின் இயல்பு வாழ்க்கை பாதிக்கப்பட்டது. பல்வேறு இடங்களில் இடியுடன் கூடிய மழையும் சேர்ந்து கொள்ள நகரம் முற்றிலும் ஸ்தம்பித்தது.

வடாலா பகுதியில் 40 முதல் 50 கிலோமீட்டர் வேகத்தில் வீசிய புழுதிப் புயலில் தாக்குப்பிடிக்க முடியாமல் 100 அடி உயர ராட்சத இரும்பு பேனர் அருகில் இருந்த பெட்ரோல் பங்கின் மீது விழுந்து 16 பேர் பலியாயினர். 75க்கு மேற்பட்டோர் காயமுற்றனர். வேரோடு மரங்கள் சாய்ந்தும் மின்சாரம் துண்டிக்கப்பட்டும் மக்கள் போக்குவரத்து அடியோடு ரத்தானது.

புழுதிப்புயல் வறண்ட நிலத்தில் நடக்கும் ஒரு வாயு வன்முறை.காற்று மண்டலத்தின் வேகம் ஒரு குறிப்பிட்ட அளவை விட அதிகரிக்கும் போது மணல் மற்றும் தூசிகளை வறண்ட நிலங்களில் இருந்து அகற்றி தன்னுடன் எடுத்துச் சென்று வேறு இடங்களில் வேகமாக வீசுகிறது. கடும் வேகத்துடன் வீசும் புழுதிப்புயல் ஒரு சுவர் போல உயர்ந்து நிற்கும் போது அது 'ஹபூப் என்று அழைக்கப்படுகிறது.

பொதுவாக இடைவிடாத வெப்ப அலைக்கு பின்பு வரும் மழையுடன் புழுதிப்புயல் தோன்ற வாய்ப்பு அதிகம். புழுதிப்புயல் ஏற்பட்டால் நிலம் தரிசாக மாறிவிடும். அரேபியத் தீபகற்பத்தை ஒட்டியுள்ள சகாரா புழுதிப்புயலை உருவாக்கும் முக்கிய பகுதியாக உள்ளது.