അടുത്ത ജന്മത്തിലും സിനിമാ നടിയാകണം - ജയപ്രദ

എപ്പോഴും സന്തോഷവതിയായിരിക്കുന്നപോലെ ഞാൻ അഭിനയിക്കും

- പ്രീത അജയ്

എൺപതുകളിൽ ദക്ഷിണേന്ത്യൻ സിനിമയിൽ വേരുറപ്പിച്ച് ബോളിവുഡ്ഡിലും സ്വപ്നകന്യകയായി ജ്വലിച്ച് താരസുന്ദരി അന്നത്തെ സൂപ്പർ സ്റ്റാറുകളുടെയൊക്കെ നായികയായി വിലസിയ ജയപ്രദ സൗന്ദര്യത്തിലും അഭിനയത്തിലും മാത്രമല്ല രാഷ്ട്രീയത്തിലും കീർത്തി നേടി. ഇന്നും തന്റെ അഭിനയം തുടരുന്ന ജയപ്രദ തന്റെ വിജയകരമായ ജീവിതപ്രയാണത്തെ ഇവിടെ അനുസ്മരിക്കുന്നു.

ഞാൻ ജനിച്ചുവളർന്നത്. ആന്ധ്രയിലാണ്. വളരെ സന്തുഷ്ടമായിരുന്നു എന്റെ ബാല്യകാലം. എന്റെ സന്തോഷം അത് എന്തായാലും മറ്റുള്ളവർക്കും ഞാൻ പകർന്നുനൽകുമായിരുന്നു.

 അച്ഛൻ കൃഷ്ണറാവു തെലുങ്ക് സിനിമാ ഫൈനാൻസി യറായിരുന്നു. അതുകാരണം അച്ഛനൊപ്പം ഇടയ്ക്കിടെ സിനിമ കാണുവാനുള്ള അവസരങ്ങൾ കിട്ടിയിരുന്നു. സ്കൂൾ ഹോളിഡെയ്സിൽ അച്ഛനൊപ്പം ചെന്നൈയ്ക്ക് പോകുമായിരുന്നു. അപ്പോൾ എൻ.ടി. രാമറാവു സാറിന്റെ ഷൂട്ടിംഗ് ലൊക്കേഷനിൽ പോകും. അദ്ദേഹത്തിന്റെ വീട്ടിൽ ഒരു മകളെപ്പോലെയാണ് ഞാൻ വളർന്നത്. പിൽക്കാലത്ത് അദ്ദേഹത്തിന്റെ ജോഡിയായി ഒട്ടനവധി സിനിമകളിൽ ഞാൻ അഭിനയിച്ചത് ഇന്നും എനിക്ക് അത്ഭുതമായി തോന്നുന്നു.

ഒൻപതാം ക്ലാസിൽ പഠിക്കുന്ന സമയത്ത് സ്ക്കൂൾ വാർഷിക ആഘോഷത്തിൽ ഞാൻ ക്ലാസിക്കൽ നൃത്തം ചെയ്തു. ആ പരിപാടിയിൽ വിശിഷ്ട അതിഥിയായിരുന്ന ഒരു തെലുങ്ക് സംവിധായകന് എന്റെ ഡാൻസ് വളരെയധികം ഇഷ്ടപ്പെട്ടു. അദ്ദേഹത്തിന്റെ ഭൂമിഘോഷം' എന്ന സിനിമയിൽ മൂന്ന് മിനിറ്റ് വരുന്ന ഒരു പാട്ടിന് എന്നെ നൃത്തം ചെയ്യിച്ചു. അഭിനയിക്കാൻ വിസമ്മതിച്ച എന്നെ വീട്ടുകാർ പ്രോത്സാഹിപ്പിക്കയായിരുന്നു. ആ ആദ്യസിനിമയിൽ അഭിനയിച്ചതിന് എനിക്ക് പത്ത് രൂപ ശമ്പളം കിട്ടി. സിനിമാക്കാർക്കിടയിൽ കൃഷ്ണറാവുവിന്റെ പുത്രി അങ്ങനെ പോപ്പുലറായി.