മോഹിനിയാട്ടത്തിലെ പരീക്ഷണവഴിയിൽ

മഹാകവി രബീന്ദ്രനാഥ ടാഗോറിന്റെ ഗീതാഞ്ജലി അഷ്ടനായികമാരുടെ ഉദാത്തശൃംഗാര പരിചരണത്തിലൂടെ മോഹിനിയാട്ട ആവിഷ്കാരമായി അരങ്ങിലെത്തിയപ്പോൾ ന്യൂഡെൽഹിയിലെ പ്രൗഢഗംഭീരമായ സദസ്സിന് അതൊരു വേറിട്ട അനുഭവ മായി. മഹാകവി ജി. ശങ്കരക്കുറുപ്പിന്റെ പരിഭാഷയിൽ ഗീതാഞ്ജലിക്ക് മോഹിനിയാട്ടത്തിലൂടെ ലാവണ്യാത്മകത പകർന്ന പ്രമുഖ നർത്തകിയായ വിനീത നെടുങ്ങാടിയെ അഭിനന്ദിക്കാൻ ആസ്വാദകർ മത്സരിച്ചു. ആദ്യമായി അരങ്ങിലെത്തിയ ഗീതാ ഞ്ജലിയുടെ വൈവിധ്വമാർന്ന അർത്ഥതലങ്ങൾ മോഹിനിയാട്ടത്തിന്റെ ലാസ്വരസ ഭാവങ്ങളിലൂടെ അനുവാചക ഹൃദയങ്ങളിൽ നവ്യാനുഭൂതിയായി പെയ്തിറങ്ങുകയായിരുന്നു.

- എം.എസ്. ദാസ് മാട്ടുമന്ത

മലയാളികളുടെ മനസ്സുകളിൽ പതിഞ്ഞുപോയ ശ്രദ്ധേയമായ നിരവധി കവിതകൾ മോഹിനിയാട്ടമായി ചിട്ടപ്പെടുത്തി അരങ്ങിലെത്തിച്ച് മോഹിനിയാട്ടമെന്ന കലാരൂപത്തെ ജനകീയമാക്കുന്നതിൽ പ്രമുഖ പങ്ക് വഹിക്കുന്ന വിനീത നെടുങ്ങാടിയുടെ ശ്രദ്ധേയമായ കൊറിയോഗ്രാഫികളിലൊന്നാണ് ടാഗോറിന്റെ ഗീതാഞ്ജലി. വിവിധ ഇന്ത്യൻ സംസ്ഥാനങ്ങളിലും, അബുദാബി, ദുബായ്, ഖത്തർ, കുവൈറ്റ് തുടങ്ങിയ ഗൾഫ് നാടുകളിലും മലയാളികളായ സദസ്സിന് മുന്നിൽ ഗീതാഞ്ജലി ഉൾപ്പെടെയുള്ള നിരവധി കൊറിയോഗ്രാഫികൾ അവതരിപ്പിച്ച വിനീത നെടുങ്ങാടി പ്രേക്ഷകരുടെ മുക്തകണ്ഠമായ പ്രശംസ പിടിച്ചു പറ്റിയിരുന്നു.

മോഹിനിയാട്ടത്തിന്റെ ചരിത്രത്തിലാദ്യമായി പരപരാഗതമെന്ന് വിശ്വസിക്കപ്പെടുന്ന നർത്തകിയുടെ വേഷവിധാനത്തിൽ മാറ്റം വരുത്തി പുതിയൊരു വേഷം മോഹിനിയാട്ടത്തിന് നൽകിയത് വിനീത നെടുങ്ങാടിയാണ്. കഴിഞ്ഞ പതിനഞ്ച് വർഷമായി സ്വയം രൂപകൽപ്പന ചെയ്ത വേഷത്തിലാണ് വിനീത മോഹിനിയാട്ടം അവതരിപ്പിക്കുന്നത്. മോഹിനിയാട്ടമെന്ന കലാരൂപത്തെ ജീവവായുപോലെ പ്രണയിക്കുന്ന വിനീത നെടുങ്ങാടി കലാമണ്ഡലം ഗുരുമുഖത്ത് നിന്ന് സ്വായത്തമാക്കിയ ക്ഷേമാവതിയുടെ മോഹിനിയാട്ടത്തിന്റെ പരമ്പരാഗതമായ ശൈലിയിൽ മാത്രം നിലയുറപ്പിക്കാതെ കലാപരമായ പുതിയ സാധ്യതകൾക്ക് പിറവി നൽകാനാണ് ശ്രമിച്ചു കൊണ്ടിരിക്കുന്നത്.

പാലക്കാട് നഗരത്തിലെ കൊപ്പത്താണ് വിനീത നെടുങ്ങാടിയുടെ ശ്രീലകം എന്ന വിശാലമായ കളരിയുള്ളത്. മോഹിനിയാട്ടത്തിന്റെ പരമ്പരാഗതവും നവീനവുമായ സഞ്ചാരപഥങ്ങളിലൂടെ പുതിയ നർത്തകിമാരെ ആനയിക്കുന്ന വിനീത് നെടുങ്ങാടിയുടെ മനസ്സിൽ നിറയുന്നത് മോഹിനിയാട്ടത്തിന്റെ ലാസ്യരസ പ്രധാനമായ പരീക്ഷണ സാധ്യതകളാണ്.