അനുഭവങ്ങളുടെ ഉൾക്കരുത്തുമായി ഒരു അഭിനയയാത്ര

അഭിനയസാധ്യതയുള്ള വൈവിധ്യമാർന്ന കഥാപാത്രങ്ങൾ ചെയ്യാനാണ് ഞാൻ ആഗ്രഹിക്കുന്നത്

- എം.എസ്. ദാസ് മാട്ടുമന്ത

കേരള എക്സ്പ്രസ്സിൽ തിരുവനന്തപുരം മുതൽ ന്യൂഡെൽഹി വരെ ചായവിറ്റ് നടക്കുമ്പോഴും പെയിന്റിംഗ് ജോലിയിലും, കാറ്ററിംഗിലും ജീവിതം ചുവടുറപ്പിക്കുമ്പോഴും ശരത്ത് അപ്പാനിയുടെ മനസ്സിൽ പച്ചപിടിച്ചു നിന്നത് അഭിനയമായിരുന്നു. അരങ്ങിന്റെ സ്പന്ദനം അനുഭവിച്ചറിഞ്ഞ് ക്യാമറയുടെ മുന്നിൽ കഥാപാത്രമാവുന്ന ശരത്ത് കുമാറെന്ന ശരത്ത് അപ്പാനിയുടെ ചിന്തകളിൽ ഊർജ്ജമായി നിറഞ്ഞുനിന്നത് കടന്നുവന്ന വഴികളിലെ പ്രതിസന്ധികളിൽ നിന്നുള്ള അതിജീവനമാണ്. മലയാള ത്തിലും തമിഴിലുമായി തിരക്കേറുമ്പോഴും അഭിനയത്തെ ശരത്ത് അപ്പാനി ജീവവായു പോലെ പ്രണയിക്കുകയാണ്.

തമിഴ്നാട്ടിലുടനീളം ഞാൻ മൃഗമായി മാറി എന്ന ചിത്രം വിജയകരമായി പ്രദർശനം തുടരുമ്പോൾ ചിത്രത്തിലെ പ്രധാന വില്ലനായ ശരത്ത് അപ്പാനിയുടെ പെർഫോമൻസ് ഇതിനകം ചർച്ചാവിഷയമായി മാറിയിരിക്കുന്നു. ഇപ്പോൾ, ഈ ചിത്രത്തിന്റെ വൻവിജയത്തിലൂടെ ശരത്ത് അപ്പാനിയുടെ തലവര തെളിഞ്ഞിരിക്കുന്നു. കൈനിറയെ ചിത്രങ്ങളുമായി തമിഴിൽ വില്ലൻ വേഷങ്ങളിലൂടെ ശരത്ത് അപ്പാനി പ്രേക്ഷകരുടെ മനം കവരുകയാണ്.

മലയാളത്തിലാവട്ടെ ആദ്യമായി പോലീസ് വേഷം ചെയ്യുന്ന കാക്കിപ്പടയെന്ന ചിത്രത്തിലൂടെയും ശരത്ത് അപ്പാനി ശ്രദ്ധേയനായിരിക്കുന്നു.

തിയേറ്റർ എക്സ്പീരിയൻസിലൂടെ ആർജ്ജിച്ചെടുത്ത ഊർജ്ജമാണ് സിനിമയിൽ കഥാപാത്രത്തിന്റെ ഹൃദയവിചാരങ്ങളിലൂടെ സഞ്ചരിക്കാൻ ശരത്ത് അപ്പാനിയെ പ്രാപ്തനാക്കുന്നത്. കാലടി ശ്രീശങ്കര കോളേജിൽ എം.എ നാടകപഠനത്തിലൂടെ നാടകത്തിന്റെ കരുത്ത് തിരിച്ചറിഞ്ഞ ശരത്ത് അപ്പാനി കർണ്ണഭാരത്തിലെ ഇന്ദ്രനായും വിജയ് ടെണ്ടുൽക്കറുടെ സൈക്ലിസ്റ്റ് എന്ന നാടകത്തിലെ  കേന്ദ്ര കഥാപാത്രമായ സൈക്ലിസ്റ്റായും  പ്രേക്ഷകരുടെ മുക്തകണ്ഠമായ പ്രശംസ പിടിച്ചുപറ്റിയിരുന്നു. ശരത്ത് ശരത്ത് അപ്പാനി സംവിധാനം ചെയ്ത ഫ്രൈഡേ എന്ന നാടകവും ഏറെ ശ്രദ്ധിക്കപ്പെട്ടു.