അഭിനയരംഗത്തുനിന്നും ശാന്തിതീരത്തേയ്ക്ക്...

ഒരു അഭിനേത്രി എന്നതിനപ്പുറം ജീവിതത്തിൽ ഒരു സംരക്ഷകയുടെ യഥാർത്ഥ വേഷം കെട്ടാൻ കാലം നിയോഗിക്കപ്പെടുന്നവരിൽ ഒരാളാണ് ജയശ്രീ

നാടകവേദിയിലേക്ക് ജയശ്രീയുടെ കടന്നുവരവ് യാദൃച്ഛികമായിരുന്നു. നേരത്തെ നിശ്ചയിച്ച നടി ഇല്ലാതെ വന്നപ്പോൾ വിളിച്ചു നൽകിയ വേഷത്തിൽ തിളങ്ങാൻ കഴിഞ്ഞതാണ് ജയശ്രീയെ പിൽക്കാലത്തു തിരക്കുള്ള നടിയാക്കി മാറ്റിയത്. പതിമൂനിൽപ്പരം സമിതികളിലാണ് ഇങ്ങനെ പകരക്കാരിയായി പ്രത്യക്ഷപ്പെട്ടത്. അഭിനയം നന്നായിരുന്നുവെന്ന് റിഹേഴ്സൽ ക്യാമ്പിലുണ്ടായിരുന്നവർ അഭിപ്രായം പറഞ്ഞതോടെയാണ് നാടകത്തെ ഗൗരവമായെടുത്തത്. അവ്വിധത്തിൽ ജയശ്രീയുടെ നാടക ഓർമ്മകളിൽ കൊല്ലം ആത്മമിത്രയുടെ “രാജപ്രമുഖൻ' ഇന്നും സജീവമായി നിൽക്കുന്നു. ഒരു പകരക്കാരിയിൽ നിന്നും മൂവായിരത്തിൽപ്പരം വേദികളിലേക്കുള്ള പ്രയാണത്തിൽ തുടക്കമായിരുന്നു അത്.