ലാസ്യഭാവങ്ങളുടെ ചന്ദനമഴയിൽ നനഞ്ഞു

പാലക്കാട് നഗരത്തിലെ രാപ്പാടി ഓപ്പൺ എയർ സ്റ്റേഡിയത്തിലുള്ള ഗ്രീൻ റൂമിൽ വച്ചാണ് പ്രശസ്ത നർത്തകി ഗായത്രി മധുസൂദനനോട് നിലാക്കനവിനെക്കുറിച്ച് ചോദിച്ചത്. നിലവിഹായസ്സിലേക്ക് കാഴ്ചക്കാരെ കൈപിടിച്ച് കൂട്ടിക്കൊണ്ടുപോകാറുള്ള ആ ആഹ്ലാദകരമായ നൃത്താനുഭവം പങ്കുവയ്ക്കുന്നു ഗായത്രി ഇവിടെ..

- എം.എസ്. ദാസ് മാട്ടുമന്ത

ഗായത്രി സ്വരലയ ദേശീയ നൃത്ത സംഗീതോത്സവവേദിയിൽ ലാസ്യഭാവങ്ങളുടെ നിലാക്കനവിന്റെ തിരയിളക്കത്തിൽ നിറഞ്ഞുനിന്നു.

ചാന്ദ്രയാൻ വിജയത്തിന്റെ ശിൽപികളായ ഐ.എസ്.ആർ.ഒ ശാസ്ത്രജ്ഞർക്കുള്ള സമർപ്പണമായി നിലാക്കനവ് മോഹിനിയാട്ടം കൊറിയോഗ്രാഫി മാറുകയായിരു ന്നു. ഇനിയുള്ള നാളുകളിൽ ഇന്ത്യയിലെ ഐ.എസ്.ആർ.ഒയുടെ എല്ലാ ശാഖകളിലും ഗായത്രി മധുസൂദനന്റെ നിലാക്കനവ് മോഹിനിയാട്ടം കൊറിയോഗ്രാഫി അരങ്ങിലെത്തും.

പാശ്ചാത്യ സോപാനസംഗീതവും സമന്വയിപ്പിച്ചുകൊണ്ടുള്ള രമേശ് നാരായണന്റെ സംഗീതത്തിൽ ലാസ്യഭാവങ്ങളുടെ വേദിയിൽ നിറഞ്ഞുനിന്ന് ഗായത്രി മധുസൂദനൻ ബഹിരാകാശത്തിലെ ദൃശ്യങ്ങൾ കാഴ്ചക്കാരുടെ ഹൃദയത്തിലേക്ക് സന്നിവേശിപ്പിക്കുകയായിരുന്നു.

ചലച്ചിത്ര സംവിധായകനായ വിനോദ് മങ്കര ശാസ്ത്രത്തെയും, കലയേയും സമന്വയിപ്പിച്ചുകൊണ്ട് സംവിധാനം ചെയ്ത നിലാക്കനവ് മോഹിനിയാട്ടം നൃത്തത്തെ പ്രണയിക്കുന്നവർക്ക് വേറിട്ട അനുഭവമായി മാറി.