40+ Health Guide

നാൽപതിനുശേഷം സ്ത്രീകൾ ആഹാരരീതിയിൽ മാറ്റം വരുത്തേണ്ടതുണ്ടോ ? അവ എന്ത്, എന്തിനുവേണ്ടി ?

- ഡോ. രേവതി മണി ബാലൻ

നാൽപ്പത് കഴിഞ്ഞ സ്ത്രീകൾ രണ്ടു വിഭാഗത്തിൽപ്പെടുന്നവരാണ്. ഒന്ന് തങ്ങളുടെ ജീവിതം അസ്തമിച്ചു, വാർദ്ധക്യമായി എന്നു കരുതി മാനസികവും ശാരീരികവുമായി ക്ഷീണിതരാവുന്നവർ.

രണ്ട്- ഇല്ല എന്റെ ജീവിതം ഇനിയാണ്. ഇതുവരെ ഞാൻ മറ്റുള്ളവർക്കുവേണ്ടി ജീവിച്ചു. ഇനി ഞാൻ എനിക്കുവേണ്ടി ആസ്വദിച്ച് ഉത്സാഹപൂർവ്വം ജീവിക്കാൻ പോവുകയാണ് എന്ന് തീരുമാനിച്ച് ജീവിക്കാൻ ഒരുങ്ങുന്നവർ. ഇതിൽ രണ്ടാമത്തെ വിഭാഗത്തിൽപ്പെട്ടവരാവണം നിങ്ങൾ. ഇവിടെ കൊടുക്കുന്ന ഹെൽത്ത് ഗൈഡ് സശ്രദ്ധം വായിക്കുക. അതിൻപ്രകാരം മുന്നോട്ടു പോകുക. യൗവ്വനവും ഊർജ്ജവും താനേ കൈവരും.

നാൽപതിനുശേഷം ആർത്തവവിരാമം (മെനോപസ്) ശാരീരികമായി ഉണ്ടാക്കുന്ന മാറ്റങ്ങളെ സന്തോഷത്തോടെ സ്വീകരിക്കുക. സാധാരണ ഈ പ്രായക്കാരിൽ ഉണ്ടാവുന്ന സംശയങ്ങളും അതി നുള്ള മറുപടിയും ഒരു പരിധിയോളം ഇവിടെ വ്യക്തമായി വിവരിക്കാം. ഇതിനപ്പുറം എന്തെങ്കിലും സ്വകാര്യചോദ്യങ്ങൾ മനസ്സിലുണ്ടെങ്കിൽ അത് ഒരു കൊച്ചു ഡയറിയിൽ കുറിച്ചുവെച്ച് നിങ്ങളുടെ ഡോക്ടറെ കാണുമ്പോൾ മറക്കാതെ സംശയനിവൃത്തി തേടുക.

നാൽപതിനുശേഷം സ്ത്രീകൾ ആഹാരരീതിയിൽ മാറ്റം വരുത്തേണ്ടതുണ്ടോ ? അവ എന്ത്, എന്തിനുവേണ്ടി ?

യാതൊരു കാരണവശാലും ആരോഗ്യകരമായ പ്രാതൽ ഒഴിവാക്കരുത്. നല്ല പ്രഭാതഭക്ഷണം കഴിക്കയാൽ, ശരീരത്തിൽ ഹോർമോൺ മാറ്റങ്ങളെ ഉത്തേജിപ്പിച്ച് കലോറികളെ ഊർജ്ജമാക്കി മാറ്റി മദ്ധ്യാഹ്നവേളയിലെ വിശപ്പിനെ മിതപ്പെടുത്തി തടി കൂടാതെ ശരീരത്തെ സംരക്ഷിക്കാനാവുന്നു. പ്രോട്ടീൻ ധാരാളമായി അടങ്ങിയിട്ടുള്ള മീൻ, മുട്ട, പാൽ, ചിക്കൻ എന്നിവ മാംസാഹാരപ്രിയരും പട്ടാണി, ഇലക്കറികൾ, റാഗി, സോയാ, മുളപ്പിച്ച ധാന്യങ്ങൾ, പരിപ്പുവർഗ്ഗങ്ങൾ എന്നിവ സസ്യാഹാരപ്രിയരും കഴിക്കുന്നത് വളരെ നല്ലതാണ്. ഇത് തലച്ചോറിൽ സെറട്ടോണിന്റെ ഉൽപാദനം വർദ്ധിച്ച് മാനസികപിരിമുറുക്കം, മനസ്സിന്റെ ക്ഷീണം എന്നിവ മാറ്റി മറവിയും മന്ദതയും കുറച്ച് ഉത്സാഹഭരിതരാവാൻ സഹായിക്കുന്നു.