തലച്ചുറ്റൽ- ലക്ഷണങ്ങളും പ്രതിവിധികളും

എല്ലാ പ്രായക്കാരിലും ഒരുപോലെ ഉണ്ടാകുന്ന ഒരു പ്രതിഭാസമാണ് തലകറക്കം

- ഡോ. ഗിരിശങ്കർ

എല്ലാ പ്രായക്കാരിലും ഒരുപോലെ ഉണ്ടാകുന്ന ഒരു പ്രതിഭാസമാണ് തലകറക്കം. പ്രായമാവരിലും കുട്ടികളിലും ഒരുപോലെ ഉണ്ടാകുന്ന തലച്ചുറ്റൽ ഒരു രോഗമല്ല, ഒരു രോഗലക്ഷണം മാത്രമാണ്. മധ്യവയസ്സു കഴിഞ്ഞാൽ സ്ത്രീകളിലാണ് ഈ രോഗാവസ്ഥ കൂടുതലായി കണ്ടുവരുന്നത്. പ്രായം കൂടുന്തോറും തലച്ചുറ്റൽ ഉണ്ടാകാനുള്ള സാധ്യത കൂടിവരുന്നതായി കാണാം.

അപ്രതീക്ഷിതമായും വിപരീതമായും ഏതൊരുകാര്യം സംഭവിച്ചാലും തലകറക്കം ഉണ്ടാകാറുണ്ട്. തലകറക്കം എന്താണെന്ന് രോഗികൾക്ക് പോലും വിശദീകരിക്കാൻ പലപ്പോഴും കഴിയാറില്ല. കുട്ടികൾ സ്ക്കൂൾ അസംബ്ലിയിൽ തലകറങ്ങി വീഴുക, പരേഡിൽ തലകറങ്ങി വീഴുക, പ്രായം ചെന്നവരിൽ ഉണ്ടാകുന്ന തലകറക്കം, ചെവിയിൽ നിന്ന് ചെവിക്കായം എടുത്ത് മാറ്റുമ്പോൾ തലകറക്കം ഇവയെല്ലാം ഒരുമിച്ചൊരു രോഗലക്ഷണമായി കണക്കാക്കി നാം വിളിക്കുന്ന പേരാണ് തലച്ചുറ്റൽ അഥവാ തലകറക്കം. എന്നാൽ, ഇവയെല്ലാം പ്രത്യേകം പ്രത്യേകമാക്കിയാണ് വൈദ്യശാസ്ത്രം കാണുന്നത്. ഇവയ്ക്കെല്ലാംതന്നെ പല കാരണങ്ങളുമുണ്ട്.