പഞ്ചവർണ്ണങ്ങൾ വിരിഞ്ഞപ്പോൾ...

മ്യൂറൽ പെയിന്റിംഗിന്റെ ചരിത്രവും ചൈതന്യവും ശ്രേഷ്ഠതയുമെല്ലാം തിരിച്ചറിഞ്ഞുകൊണ്ട് സ്വന്തം കരങ്ങളിലൂടെ മലയാളത്തിലെ സമ്പൂർണ്ണമായ ഒരു നോവലിന് കഥാപാത്രങ്ങളിലൂടെ ദൃശ്യഭംഗി പകർന്ന ഒരു മഹിളയാണ് സുനിജ.

- കൃഷ്ണൻ മാലം

മ്യൂറൽ പെയിന്റിംഗിന്റെ ചരിത്രവും ചൈതന്യവും ശ്രേഷ്ഠതയുമെല്ലാം തിരിച്ചറിഞ്ഞുകൊണ്ട് സ്വന്തം കരങ്ങളിലൂടെ മലയാളത്തിലെ സമ്പൂർണ്ണമായ ഒരു നോവലിന് കഥാപാത്രങ്ങളിലൂടെ ദൃശ്യഭംഗി പകർന്ന ഒരു മഹിളയാണ് സുനിജ.

മ്യൂറൽ ചിത്രരചനയോടും ചിത്രങ്ങളോടുമെല്ലാം ചെറുപ്പം മുതലെ ഒരാവേശമായിരുന്നു സുനിജയ്ക്ക്. ശാസ്ത്രീയമായി പഠിക്കാൻ അന്നൊന്നും അവസരങ്ങളുണ്ടായില്ല. പാലക്കാട് ആലത്തൂരിനടുത്തുള്ള പാടൂർ സ്വദേശിയായ സുനി വിവാഹശേഷം കൊച്ചിയിൽ വന്നതോടെയാണ് മ്യൂറൽ ചിത്രരചനയുമായി ഇണങ്ങിച്ചേരാൻ അവസരം കിട്ടിയത്.

എറണാകുളത്തെ വീടിനോട് ചേർന്നുള്ള രവിപുരം ആർട്സ് സ്ക്കൂളിൽ മ്യൂറൽ പെയിന്റിംഗ് പഠിക്കാൻ തുടങ്ങി. പഠിച്ചു തുടങ്ങിയതോടെയാണ് ചുമർചിത്രകലയുടെ അഗാധതലങ്ങളിൽ എത്തിപ്പെട്ടാലെ പൂർണ്ണത ലഭിക്കൂ എന്ന് സുനിജയ്ക്ക് മനസ്സിലായത്. പിന്നെ അതിനുവേണ്ടിയുള്ള ആത്മാർത്ഥമായ ശ്രമങ്ങളായിരുന്നു. നല്ല ക്ഷമയും അർപ്പണബോധവും ചിന്താശക്തിയും ഭാവനയും കഴിവും ഒക്കെ ഉണ്ടെങ്കിലെ ചുമർ ചിത്രകല നൂറ് ശതമാനവും ഹൃദിസ്ഥമാക്കാൻ കഴിയുള്ളൂവെന്ന് സുനിജ തിരിച്ചറിഞ്ഞത് വേഗത്തിലാണ്. മ്യൂറൽ പെയിന്റിംഗിനോടുള്ള ഇഷ്ടം കൊണ്ടുതന്നെ പുതിയ ഒരാശയവും ഈ കലാകാരിയുടെ മനസ്സിലുദിച്ചു. ചുമർചിത്രങ്ങളോട് താൽപ്പര്യമുള്ള വേറെയും ഒട്ടേറെപ്പേരുണ്ടാകാം. അവർക്കും കാണും സംശയങ്ങൾ. ഈ രംഗത്തേയ്ക്ക് പുതിയതായി വരുന്നവർക്ക് സംശയങ്ങൾ ഇല്ലാതിരിക്കാനും പുതിയ അറിവുകൾ നൽകാനുമായി ചുമർചിത്ര കല സംബന്ധിച്ചുള്ള എല്ലാ വിവരങ്ങളും ഉൾപ്പെടുത്തി ഒരു പുസ്തകമിറക്കിയാൽ നന്നായിരിക്കില്ലേയെന്ന് തോന്നിയപ്പോൾ ആ സംശയം അക്ഷരങ്ങളായി പിറക്കാൻ തുടങ്ങി.